തിരുവനന്തപുരം: നിയമസഭ കയ്യാങ്കളിക്കേസ് കോടതി ഇന്ന് പരിഗണിക്കും. കേസിൽ മന്ത്രി ശിവൻകുട്ടി അടക്കമുള്ള പ്രതികൾ കോടതിയിൽ ഹാജരായേക്കും. കേസിലെ ആറ് പ്രതികളുടേയും വിടുതൽ ഹർജി തള്ളിയ സാഹചര്യത്തിൽ നേരിട്ട് ഹാജരാകാൻ കോടതി നിർദ്ദേശിച്ചിരുന്നു.
കേസിലെ പ്രതികൾ ഇന്ന് ഹാജരായാൽ കുറ്റപത്രം കോടതി വായിക്കും. വിദ്യാഭ്യാസമന്ത്രി വി. ശിവൻകുട്ടി, ഇ.പി ജയരാജൻ, കെ.ടി ജലീൽ, കെ അജിത്ത്, കെ. കുഞ്ഞഹമ്മദ്, സികെ സദാശിവൻ എന്നിവരാണ് കേസിലെ പ്രതികൾ.
തിരുവനന്തപുരം ചീഫ് ജുഡീഷ്യൽ മജിസ്ട്രേറ്റ് കോടതിയാണ് കേസ് പരിഗണിക്കുന്നത്. 2015 മാർച്ച് 13 ന് അന്നത്തെ ധനമന്ത്രി കെ.എം മാണി ബജറ്റ് അവതരിപ്പിക്കുന്നത് തടയാൻ ആക്രമണം നടത്തി 2.20 ലക്ഷം രൂപയുടെ നഷ്ടം വരുത്തി എന്നാണ് പോലീസ് കേസ്.
