ചെന്നൈ: പഴക്കമുള്ള കെട്ടിടത്തിന്റെ മതിൽ തകർന്ന് പോലീസുകാരന് ദാരുണാന്ത്യം. മധുരയിലെ നെൽപ്പെട്ടൈയിലാണ് സംഭവം. അപകടത്തിൽ മറ്റൊരു പോലീസുകാരന് പരിക്കേറ്റിട്ടുണ്ട്. ഹെഡ് കോൺസ്റ്റബിളായ ശരവണനാണ് മരിച്ചത്. ഇയാൾക്കൊപ്പമുണ്ടായിരുന്ന കോൺസ്റ്റബിൾ കണ്ണനെ പരിക്കുകളോടെ ആശുപത്രിയിൽ പ്രവേശിപ്പിച്ചിരിക്കുകയാണ്. ഏകദേശം 100 വർഷം പഴക്കമുള്ള കെട്ടിടത്തിന്റെ മതിലാണ് തകർന്ന് വീണതെന്ന് നാട്ടുകാർ പറയുന്നത്.
അപകടം നടക്കുമ്പോൾ ഇരുവരും കെട്ടിടത്തിന്റെ മുന്നിൽ നിൽക്കുകയായിരുന്നു. അപ്രതീക്ഷിതമായി മതിൽ തകർന്ന് വീഴുകയായിരുന്നു. മരിച്ച പോലീസുകാരൻ മതിലിന്റെ അടിയിൽ അകപ്പെട്ടെന്നും നാട്ടുകാർ കൂട്ടിച്ചേർത്തു. സംഭവത്തിൽ കെട്ടിടത്തിന്റെ നിലവിലെ ഉടമയ്ക്കും നടത്തിപ്പുകാരനുമെതിരെ പോലീസ് അന്വേഷണം ആരംഭിച്ചു. പഴക്കമായ കെട്ടിടം പുനർനിർമ്മിക്കാനോ, അറ്റകുറ്റപണികൾ നടത്തുവാനോ ഇവർ തയ്യാറാകാത്തതാണ് അപകട കാരണം എന്നാണ് ആരോപണം ഉയരുന്നത്.
അപകടത്തിൽ മരിച്ച പോലീസുകാരന്റെ കുടുംബത്തിന് 25 ലക്ഷം രൂപ നഷ്ടപരിഹാരം നൽകുമെന്ന് തമിഴ്നാട് സർക്കാർ പ്രഖ്യാപിച്ചു. കൂടാതെ, പരിക്കുപറ്റി ആശുപത്രിയിൽ കഴിയുന്ന പോലീസുകാരന്റെ ചികിത്സയ്ക്കായി 5 ലക്ഷം രൂപ നൽകുമെന്നും സർക്കാർ അറിയിച്ചു.
