കൊച്ചി: ആരാധകരുടെ പ്രാർത്ഥനകൾക്കും അസുഖത്തെക്കുറിച്ചുളള അന്വേഷണങ്ങൾക്കും നന്ദി അറിയിച്ച് സംവിധായകനും നടനുമായ മേജർ രവി. വൃക്കമാറ്റിവെയ്‌ക്കൽ ശസ്ത്രക്രിയയ്‌ക്ക് ശേഷം കൊച്ചിയിലെ സ്വകാര്യ ആശുപത്രിയിൽ വിശ്രമത്തിലാണ് അദ്ദേഹം. രാവിലെ ജനംടിവി ഡോട്ട് കോം മേജർ രവിയുടെ ശസ്ത്രക്രിയ സംബന്ധിച്ച വാർത്ത നൽകിയിരുന്നു. ഇതിന്റെ കമന്റ് ബോക്‌സിലാണ് അദ്ദേഹം ആരാധകർക്ക് നന്ദി അറിയിച്ചത്.
‘എല്ലാവരോടും സ്‌നേഹത്തോടെ നന്ദി, ദൈവം എല്ലാവരേയും അനുഗ്രഹിക്കട്ടെ… സ്‌നേഹത്തോടെ മേജർ രവി’ എന്നാണ് അദ്ദേഹം കമന്റ് ചെയ്തത്. ആശുപത്രിയിൽ പ്രവേശിപ്പിച്ചതിന് പിന്നാലെ സിനിമയ്‌ക്ക് അകത്തും പുറത്തുമുള്ള നിരവധി പേരാണ് അദ്ദേഹത്തിന്റെ ആരോഗ്യത്തിനായി പ്രാർത്ഥിച്ച് എത്തിയത്. ശസ്ത്രക്രിയ വിജയകരമായി പൂർത്തിയായെന്നും ഐസിയുവിൽ നിന്ന് മാറ്റിയെന്നും അദ്ദേഹം ഫേസ്ബുക്കിലൂടെയാണ് അറിയിച്ചത്.
ജനം ടിവി ഡോട്ട് കോം നൽകിയ വാർത്തയിൽ മേജർ രവിയുടെ ആരോഗ്യത്തെക്കുറിച്ച് അന്വേഷിച്ച് നിരവധി കമന്റുകൾ ഫേസ്ബുക്കിൽ ലഭിച്ചിരുന്നു. അദ്ദേഹത്തിന്റെ സൗഖ്യത്തിനായും ആരോഗ്യസ്ഥിതി മെച്ചപ്പെടാനുമുളള പ്രാർത്ഥനകളും ആശംസകളും കമന്റുകളിൽ നിറഞ്ഞിരുന്നു. ഇതിന് ശേഷമായിരുന്നു അദ്ദേഹത്തിന്റെ മറുപടി.
രണ്ട് ദശാബ്ദത്തോളം സൈനികനായി സേവനം അനുഷ്ഠിച്ച മേജർ രവി നടനായാണ് സിനിമയിലെത്തുന്നത്. മേഘം, ശ്രദ്ധ, ഒന്നാമൻ തുടങ്ങിയ ഇരുപതിൽ അധികം ചിത്രങ്ങളിൽ വേഷമിട്ട അദ്ദേഹം പുനർജനി എന്ന ചിത്രത്തിലൂടെയാണ് സിനിമാ സംവിധാന രംഗത്തേക്ക് എത്തുന്നത്. മോഹൻലാലിനെ നായകനാക്കി ഒരുക്കിയ കീർത്തിചക്ര വൻ വിജയമായിരുന്നു.
