കാക്കയെ പരാമർശിക്കുന്ന ഒട്ടനവധി പഴഞ്ചൊല്ലുകളും ഉപമകളും ഒക്കെ മലയാളികൾക്കിടയിലുണ്ട്. അവയിൽ കാക്കയെന്ന പക്ഷിയെ അൽപം ഇകഴ്ത്തുന്നവയും ഉൾപ്പെടും. പ്രണയിക്കുന്ന പെൺകുട്ടി കാക്കയെ പോലെ ഇരുന്നാലും ഐശ്വര്യറായി ആയിട്ടെ കാമുകന് തോന്നൂവെന്ന ചില ‘തമാശയും’, കാക്ക കുളിച്ചാൽ കൊക്കാകുമോ എന്ന പഴഞ്ചൊല്ലുമെല്ലാം ചില ഉദഹരണങ്ങളാണ്. ഇത്തരം തമാശകൾ പറയുന്നവർക്ക് തിരിച്ചടിയെന്നോണം ഒരു ‘കാക്കത്തമ്പുരാട്ടി’ സമൂഹ മാദ്ധ്യമങ്ങളിൽ വൈറലാകുകയാണ്.
I am limited edition with an attitude pic.twitter.com/KIReTSEJtt
— Susanta Nanda IFS (@susantananda3) March 23, 2021
ഇന്ത്യൻ ഫോറസ്റ്റ് സർവീസിലെ ഉദ്യോഗസ്ഥനായ സുശാന്ത നന്ദ പോസ്റ്റ് ചെയ്ത ഒരു കാക്കയുടെ വീഡിയോയാണ് ഏറെ പ്രചാരം നേടുന്നത്. വെറും പത്ത് സെക്കൻഡ് മാത്രം ദൈർഘ്യമുള്ള ദൃശ്യങ്ങൾ പ്രചരിക്കാൻ തുടങ്ങിയതോടെ കാക്ക ആയിരക്കണക്കിന് ആരാധകരെ നേടുകയാണ്. കാരണം റാമ്പിൽ മത്സരത്തിനായി നടക്കുന്ന മോഡലിന്റെ ‘ആറ്റിറ്റിയൂഡിനെ’ കവച്ചുവെക്കുന്ന പ്രകടനമാണ് വീഡിയോയിലെ കാക്ക കാഴ്ച വെക്കുന്നത്.
ഒരു മതിലിന് പുറത്തുകൂടി കാക്ക നടക്കുന്നു എന്നത് മാത്രമാണ് ദൃശ്യങ്ങളിൽ ഉള്ളതെങ്കിലും ആ നടപ്പിന്റെ മനോഹാരിതയാണ് കാക്കയ്ക്ക് ആരാധകരെ നേടിക്കൊടുത്തത്. എത്ര മിടുക്കിയായ മോഡലും അമ്പരന്നു പോകുന്ന കാഴ്ച. യാതൊരു പരിശീലനവും നേടാതെ സ്വാഭാവികമായുള്ള നടത്തത്തിൽ ഇത്രയും ആറ്റിറ്റിയൂഡ് കൊണ്ടുവരുന്നത് എങ്ങിനെയെന്ന ചോദ്യമാണ് വീഡിയോയ്ക്ക് താഴെ കമന്റുകളായി എത്തുന്നത്.
‘വിശ്വസുന്ദരി ഹർനാസ് സന്ധുവിന്റെ വീട്ടിൽ പതിവായി സന്ദർശനം നടത്തിയ കാക്ക’ എന്ന് തുടങ്ങി ‘മോഡലുകളൊക്കെ ഇവിടെ കമോൺ’ എന്നുവരെയുള്ള കമന്റുകൾ വരെ വീഡിയോക്ക് താഴെ പ്രത്യക്ഷപ്പെട്ടു. അതേസമയം വീഡിയോ ആദ്യമായി പോസ്റ്റ് ചെയ്ത സുശാന്ത നന്ദ നൽകിയ തലക്കെട്ട് മറ്റൊന്നാണ്. ‘അയാം എ ലിമിറ്റഡ് എഡിഷൻ വിത്ത് ആറ്റിറ്റിയൂഡ്’ എന്നാണ് സുശാന്ത നന്ദ നൽകുന്ന തലക്കെട്ട്. ഏതായാലും സോഷ്യൽ മീഡിയയിൽ ഹിറ്റാകുകയാണ് കാക്കയും കാക്കയുടെ നടത്തവും..
