മോഹൻലാലിനെ നായകനാക്കി ബി. ഉണ്ണികൃഷ്ണൻ സംവിധാനം ചെയ്യുന്ന ചിത്രം ആറാട്ട് ഫെബ്രുവരി 10നാണ് പ്രദർശനത്തിന് എത്തുന്നത്. ഇപ്പോഴിതാ ആരാധകർക്കുള്ള ആറാട്ട് ടീമിന്റെ പുതുവത്സര സമ്മാനം പ്രഖ്യാപിച്ചിരിക്കുകയാണ് നടൻ മോഹൻലാൽ. ജനുവരി 1ന് രാവിലെ 11 മണിക്ക് ചിത്രത്തിന്റെ ട്രെയ്ലർ റിലീസ് ചെയ്യും. വില്ലൻ എന്ന സിനിമയ്ക്ക് ശേഷം മോഹൻലാലും ഉണ്ണികൃഷ്ണനും ഒന്നിക്കുന്ന ചിത്രമാണ് ആറാട്ട്.
‘നെയ്യാറ്റിൻകര ഗോപന്റെ ആറാട്ട്’ എന്നാണ് സിനിമയുടെ മുഴുവൻ പേര്. ഒരു പ്രത്യേക ചുമതല നിർവ്വഹിക്കുന്നതിനായി നെയ്യാറ്റിൻകരയിൽ നിന്നും പാലക്കാട്ടെ ഒരു ഗ്രാമത്തിൽ ഗോപൻ എത്തുന്നതും തുടർന്നുള്ള സംഭവങ്ങളുമാണ് ചിത്രത്തിന്റെ പ്രമേയം. 18 കോടി ബഡ്ജറ്റിലാണ് ചിത്രം നിർമ്മിച്ചിരിക്കുന്നത്. ശ്രദ്ധ ശ്രീനാഥ് ആണ് ചിത്രത്തിൽ നായികയായി എത്തുന്നത്.
നടൻ നെടുമുടി വേണു, സായ് കുമാർ, സിദ്ദിഖ്, വിജയരാഘവൻ, ജോണി ആന്റണി, ഇന്ദ്രൻസ്, രാഘവൻ, ഷീല, സ്വാസിക, തുടങ്ങി നിരവധി താരങ്ങൾ ചിത്രത്തിലുണ്ട്. മോഹൻലാൽ നിറഞ്ഞാടി അഭിനയിക്കുന്ന മാസ് മസാല ചിത്രമാണിതെന്നാണ് തിരക്കഥയെഴുതിയിരിക്കുന്ന ഉദയകൃഷ്ണൻ പറഞ്ഞത്. മരക്കാറിന് ശേഷം തീയേറ്ററിൽ റിലീസിനെത്തുന്ന മോഹൻലാൽ ചിത്രമാണ് ആറാട്ട്.
