കൊച്ചി: മയിലിനെ കറി വെക്കാൻ പോകുന്നുവെന്ന് പറഞ്ഞുകൊണ്ട് ദുബായിലേക്ക് പോയ യൂട്യൂബർ ഫിറോസ് ചുട്ടിപ്പാറ ചിക്കൻ കറിവെച്ച് വിവാദത്തിൽ നിന്നും തലയൂരിയത് വാർത്തയായിരുന്നു. ഇപ്പോഴിതാ ഒട്ടകത്തെ ചുടാൻ ഷാർജയിലേക്ക് യാത്ര തിരിച്ചിരിക്കുകയാണ് ഫിറോസ്. ഇത്തവണയും മയിലിനെ കറിവെയ്ക്കാൻ പോയപ്പോൾ കൂടെയുണ്ടായിരുന്ന രതീഷ്, ഫിറോസിനൊപ്പമുണ്ട്.
ഒട്ടകത്തെ നിർത്തി ചുടുന്ന വീഡിയോ ഉടൻ പങ്കുവെയ്ക്കുമെന്ന് പറഞ്ഞാണ് ഫിറോസ് ഷാർജയിലേക്ക് വിമാനം കയറിയിരിക്കുന്നത്. വീഡിയോയ്ക്ക് റീച്ച് കിട്ടാനുള്ള ഫിറോസിന്റെ ഓരോരോ തന്ത്രങ്ങളാണിതെന്നാണ് വീഡിയോയ്ക്ക് കമന്റിലൂടെ ലഭിക്കുന്ന പ്രതികരണം. ഒട്ടകത്തെ നിർത്തി പൊരിച്ച് അവിടുത്തെ പാവപ്പെട്ടവർക്ക് കൊടുക്കുമെന്നും ഇവിടെ കിട്ടാത്ത ഒരുപാട് സാധനങ്ങൾ അവിടെയുണ്ടെന്നും ഫിറോസ് പറയുന്നു.
ഫിറോസ് മയിലിനെ കറിവെയ്ക്കാൻ പോകുന്നുവെന്ന വീഡിയോ വലിയ വിവാദമായിരുന്നു. പിന്നാലെ നാട്ടിൽ മയിലിനെ തൊടുകയോ പിടിക്കുകയോ ചെയ്താൻ പ്രശ്നമാണ്. അതിനാലാണ് ദുബായിൽ വെച്ച് കറിവെയ്ക്കുന്നത്. നാട്ടിൽ ഇതാരും ചെയ്യരുതെന്നും ഫിറോസ് നിർദ്ദേശിച്ചിരുന്നു. തുടർന്ന് ഇതിനെ കറിവെയ്ക്കാനല്ല മറിച്ച് മറ്റൊരാൾക്ക് കൊടുക്കാനാണ് വാങ്ങിയതെന്ന് ഫിറോസ് പറയുകയായിരുന്നു.
മയിലിനെ ഒരിക്കലും കറി വെക്കില്ല. അത് ഞങ്ങളുടെ ദേശീയ പക്ഷിയാണ്. ഭക്ഷിക്കാനുള്ള ഒരു ജീവിയല്ല മയിൽ. മയിലിന്റെ ഭംഗി കണ്ടാൽ അങ്ങനെ ആർക്കും ചെയ്യാൻ തോന്നില്ല. മനുഷ്യനായിട്ടുള്ളവൻ മയിലിനെ കറി വെക്കില്ല. ഏത് രാജ്യത്ത് പോയാലും മയിലിനെ ദ്രോഹിക്കരുത്. അത് അടുത്ത തലമുറയ്ക്ക് കൊടുക്കേണ്ട സന്ദേശം കൂടിയാണ്. കോമഡി കണ്ടന്റ് ക്രിയേറ്റ് ചെയാൻ വേണ്ടി മാത്രമാണ് ഇത് ചെയ്തത് എന്നും ഫിറോസ് പറഞ്ഞിരുന്നു.
