സിനിമയല്ല, ഇത് ‘മിന്നൽ മുരളി( ഒറിജിനൽ)’; സൂപ്പർപവറില്ല, പക്ഷേ ചെറിയൊരു ട്വിസ്റ്റുണ്ട്

മലയാളികളുടെ ആദ്യ സൂപ്പർ ഹീറോയായ മിന്നൽ മുരളി ജനഹൃദയം കീഴടക്കിയിരിക്കുകയാണ്. മിന്നലടിച്ച് സൂപ്പർ പവറുകൾ കിട്ടുന്ന രണ്ട് കഥാപാത്രങ്ങളുടെ കഥ പറയുന്ന സിനിമ ഇപ്പോൾ നവമാദ്ധ്യമങ്ങളിൽ ഉൾപ്പെടെ ചർച്ചയായിക്കഴിഞ്ഞു. എന്നാൽ ശരിക്കും ഒരാൾക്ക് മിന്നലടിച്ചാൽ എന്തായിരിക്കും അവസ്ഥ? മിന്നലടിച്ച് അത്ഭുതകരമായി രക്ഷപ്പെട്ട ഒരാളുടെ വീഡിയോയാണ് ഇപ്പോൾ സമൂഹമാദ്ധ്യമങ്ങളിൽ വൈറലായിരിക്കുന്നത്.

ഇൻറോണേഷ്യയിലെ ജക്കാർത്തയിലാണ് ഇത് സംഭവിച്ചത്. ഒരു കമ്പനിയിലെ സെക്യൂരിറ്റി ഉദ്യോഗസ്ഥനായ 35 കാരനാണ് അപ്രതീക്ഷിതമായി മിന്നലടിച്ചത്. ജോലിക്കിടെ മഴയത്ത് കുടപിടിച്ച് പോകുമ്പോഴാണ് ഇയാൾക്ക് മിന്നലേറ്റത്. ഇതിന് പിന്നാലെ യുവാവ് നിലത്ത് വീണു. യുവാവിന് മിന്നലേൽക്കുന്ന ദൃശ്യങ്ങൾ സിസിടിവിയിൽ വ്യക്തമായി കാണാം.

Security officer in Jakarta was struck by lightning while on duty, avoid using radio and cellular telephones when it is raining, the condition of the victim survived after 4 days of treatment. not everyone has the same chance to live. 当選確率 #Bitcoin #NFTs $BTC $ETH #ALERT pic.twitter.com/4XhW6Oh3U9

— Lexus RZ (@Heritzal) December 26, 2021

മിന്നലേറ്റ് യുവാവ് താഴെ വീണതോടെ സഹപ്രവർത്തകരെത്തി ഇയാളെ ആശുപത്രിയിലെത്തിച്ചു. യുവാവിന്റെ കൈയ്‌ക്ക് പൊള്ളലേറ്റിട്ടുണ്ടെങ്കിലും മറ്റ് പരിക്കുകൾ ഒന്നുംതന്നെയില്ലെന്ന് പ്രാദേശിക മാദ്ധ്യമങ്ങൾ റിപ്പോർട്ട് ചെയ്തു. ആശുപത്രിയിൽ നിന്ന് ഡിസ്ചാർജ് ചെയ്ത യുവാവ് വീട്ടിൽ നിരീക്ഷണത്തിലാണ്.

യുവാവിന്റെ കൈയ്യിലുണ്ടായിരുന്ന വാക്കി ടോക്കി കാരണമാണ് മിന്നലേറ്റതെന്നാണ് പ്രാഥമിക നിഗമനം. എന്നാൽ മിന്നലേറ്റയാൾ മരിച്ചില്ല എന്നത് ആളുകളെ അത്ഭുതപ്പെടുത്തിയിരിക്കുകയാണ്. വീഡിയോയ്‌ക്ക് പ്രതികരണവുമായി നിരവധി പേർ രംഗത്തെത്തിയിരിക്കുന്നത്. പുതിയ മിന്നൽ മുരളി എന്ന പ്രതികരണങ്ങളാണ് വീഡിയോയ്‌ക്ക് ലഭിച്ചത്.