ലക്നൗ : ശ്രീകൃഷ്ണ ഗാനത്തെ മോശമായി ചിത്രീകരിച്ചുകൊണ്ടുള്ള സണ്ണി ലിയോണിന്റെ സംഗീത ആൽബത്തിനെതിരെ പ്രതിഷേധം കടുപ്പിച്ച് ഹിന്ദു സംഘടനകൾ. സണ്ണി ലിയോണിന്റെ പോസ്റ്ററുകൾ കത്തിച്ചു. അന്താരാഷ്ട്ര ഹിന്ദു പരിഷത്, രാഷ്ട്രീയ ബജ്രംഗദൾ എന്നീ സംഘടനകളാണ് പ്രതിഷേധം കടുപ്പിച്ചിരിക്കുന്നത്.
ആഗ്രയിലെ സൂർസദാൻ റോഡിലായിരുന്നു സംഘടനകൾ പ്രതിഷേധ പ്രകടനം നടത്തിയത്. സണ്ണി ലിയോണിനെതിരെ മുദ്രാവാക്യങ്ങളുമായി സംഘടിച്ച പ്രവർത്തകർ താരത്തിന്റെ പോസ്റ്ററുകൾ കൂട്ടിയിട്ട് കത്തിക്കുകയായിരുന്നു. എത്രയും വേഗം സംഗീത ആൽബം പിൻവലിക്കണമെന്നും പ്രവർത്തകർ ആവശ്യപ്പെട്ടു. സംഭവത്തിൽ സണ്ണി ലിയോണിനെതിരെ പ്രവർത്തകർ ഹരിപർവ്വത് പോലീസ് സ്റ്റേഷനിൽ പരാതിയും നൽകിയിട്ടുണ്ട്.
സണ്ണി ലിയോണിന്റെ പുതിയ സംഗീത ആൽബം ഹിന്ദുക്കളുടെ മതവികാരം വ്രണപ്പെടുത്തുന്നതാണെന്ന് ബജ്രംഗദൾ നേതാവ് അജ്ജു ചൗഹാൻ പറഞ്ഞു. ഹിന്ദുക്കൾ ആരാധനയോടെ കാണുന്ന രാധയെ അപമാനിക്കുന്ന തരത്തിലാണ് ആൽബത്തിലെ നൃത്തച്ചുവടുകൾ. ഇതിന് പുറമേ ആൽബം പ്രസിദ്ധമായ ഭജനയെ അപകീർത്തിപ്പെടുത്തുന്നത് ആണെന്നും അദ്ദേഹം വ്യക്തമാക്കി.
കനിക കപൂറും അരിന്ദം ചക്രവർത്തിയും പാടിയ മധുബൻ എന്ന ആൽബത്തിലാണ് രാധാകൃഷ്ണ പ്രണയം ആസ്പദമാക്കിയുള്ള ഗാനത്തെ അപമാനിക്കുന്ന തരത്തിൽ അവതരിപ്പിച്ചിരിക്കുന്നത്.സരിഗമ മ്യൂസിക്കാണ് ആൽബം പുറത്തിറക്കിയത്. ആൽബം പുറത്തുവന്ന് നിമിഷങ്ങൾക്കുള്ളിൽ തന്നെ സണ്ണി ലിയോണിനെതിരെ വ്യാപക പ്രതിഷേധം ഉയർന്നു വന്നിരുന്നു. പരാതികളും പ്രതിഷേധവും വ്യാപകമായതോടെ ആൽബം പിൻവലിക്കണമെന്ന് കേന്ദ്ര ആഭ്യന്തര മന്ത്രാലയം ആവശ്യപ്പെട്ടിട്ടുണ്ട്.
