കോഴിക്കോട് : സംസ്ഥാന സർക്കാരിന്റെ സിൽവർ ലൈൻ പദ്ധതിയിൽ സിപിഎമ്മിനും സിപിഐക്കും ഒരു അഭിപ്രായമേ ഉള്ളുവെന്ന് സിപിഐ സംസ്ഥാന സെക്രട്ടറി കാനം രാജേന്ദ്രൻ. കെ റെയിൽ എൽഡിഎഫിന്റെ പരിപാടിയാണ്. പദ്ധതി സർക്കാർ നടപ്പിലാക്കും. കെ റെയിലിനെക്കുറിച്ച് അറിവില്ലാത്തവരാണ് പദ്ധതിയെ എതിർക്കുന്നത് എന്നും കാനം രാജേന്ദ്രൻ പറഞ്ഞു.
പുതിയ പദ്ധതികൾ എന്നും ആശങ്കയുണ്ടാക്കും. അതിനാൽ ജനങ്ങൾക്ക് അഭിപ്രായം പറയാൻ അവകാശമുണ്ട്. അത് പരിഹരിക്കേണ്ടത് സർക്കാരിന്റെ ബാദ്ധ്യതയാണ്. ഇപ്പോൾ തൽക്കാലം അലൈൻമെന്റ് നിർണയിക്കാനുള്ള നടപടികൾ മുന്നോട്ട് പോവണമെന്നും അതിനോട് ജനങ്ങൾ സഹകരിക്കണമെന്നും കാനം ആവശ്യപ്പെട്ടു.
ഇങ്ങനെയൊരു പദ്ധതിക്കെതിരെ എതിർപ്പുകൾ സ്വാഭാവികമാണ്. എതിർക്കുന്നവരെ ബോദ്ധ്യപ്പെടുത്തി മുന്നോട്ട് പോകാനാണ് എൽഡിഎഫ് ശ്രമിക്കുന്നത് എന്നും കാനം ന്യായീകരിച്ചു. കെ റെയിൽ പദ്ധതിക്കെതിരെ സിപിഎമ്മിനുള്ളിൽ തന്നെ വിമർശനം ശക്തമായിരിക്കുന്ന സാഹചര്യത്തിലാണ് കാനം രാജേന്ദ്രന്റെ വിശദീകരണം.
