പോലീസിന്റെ വീട് ആക്രമിച്ച് ‘മിന്നൽ മുരളി ഒറിജിനൽ’; വീടിന് മുന്നിൽ മലമൂത്രവിസർജനം നടത്തി; പ്രതികളെ തേടി പോലീസ്

കോട്ടയം ; കോട്ടയത്ത് പോലീസ് ഉദ്യോഗസ്ഥന്റെ വീട് ആക്രമിച്ച് ‘മിന്നൽ മുരളി ഒറിജിനൽ.’ കുമരകത്ത് പോലീസ് ഉദ്യോഗസ്ഥനായ ചെപ്പന്നൂക്കരി ചെമ്പിത്തറ ഷാജിയുടെ വീടിന് നേരെയാണ് സാമൂഹ്യവിരുദ്ധരുടെ ആക്രമണം നടത്തിയത്. വീടിന്റെ ജനൽച്ചില്ലുകളും വാതിലും അടിച്ചുതകർക്കുകയും വാതിൽക്കൽ മലമൂത്രവിസർജനം നടത്തുകയും ചെയ്തു. തുടർന്ന് മലയാളം സൂപ്പർ ഹീറോ സിനിമയെ ഓർമ്മിക്കുന്ന രീതിയിൽ ഭിത്തിയിൽ ‘മിന്നൽ മുരളി ഒറിജിനൽ’ എന്നും എഴുതിവെച്ചിട്ടുണ്ട്.

വെച്ചൂരിലുള്ള വീട്ടിലാണ് റെയിൽവേ സ്‌റ്റേഷൻ പോലീസ് ഉദ്യോഗസ്ഥനായ ഷാജിയും മഞ്ജുവും മൂന്ന് പെൺമക്കളും താമസിക്കുന്നത്. രാത്രി സമയത്താണ് സാമൂഹ്യ വിരുദ്ധർ ഇവരുടെ വീടിന് നേരെ ആക്രമണം നടത്തിയത്. ശൗചാലയം തല്ലി തകർക്കുകയും വാതിൽക്കൽ മലമൂത്രവിസർജം നടത്തുകയും ചെയ്തു.

രണ്ടാഴ്ച മുമ്പ് ഇവിടെ മദ്യപിക്കാനെത്തിയ യുവാക്കളെ വീട്ടുടമ പറഞ്ഞയച്ചു. കഴിഞ്ഞരാത്രി കുമരകം പോലീസ് നടത്തിയ പരിശോധനയിൽ മദ്യപാനികളെ കണ്ടെത്തി ഇവിടെനിന്നും ഓടിച്ച് വിട്ടിരുന്നു. ഇതിന്റെ പ്രതികാരമായാണ് വീട് ആക്രമിച്ചത് എന്നാണ് പോലീസിന്റെ പ്രാഥമിക നിഗമനം. സംഭവസ്ഥലത്ത് ഇവരുടെ ബൈക്കുകൾ ഉണ്ടായിരുന്നു. പ്രതികളെ ഉടൻ കണ്ടെത്താനാകുമെന്ന് പോലീസ് പറയുന്നു. അതേസമയം പ്രദേശത്ത് സാമൂഹ്യവിരുദ്ധരുടെ അഴിഞ്ഞാട്ടമാണ് നടക്കുന്നത് എന്ന് പ്രദേശവാസികൾ പരാതിപ്പെടുന്നു