ഗുരുവായൂർ: ഗുരുവായൂർ ക്ഷേത്രപ്രവേശന സത്യാഗ്രഹസമരത്തിന്റെ ചെയർമാൻ മന്നത്തു പത്മനാഭന്റെ പ്രതിമ ഗുരുവായൂരിൽ സ്ഥാപിക്കണമെന്ന് ഗ്ലോബൽ നായർ സർവീസ് സൊസൈറ്റി. ഭാരത കേസരി മന്നത്ത് പത്മനാഭന്റെ 145 ാമത് ജന്മദിനാഘോഷ പരിപാടിയിൽ ഗ്ലോബൽ നായർ സർവീസ് സൊസൈറ്റി ചാവക്കാട് താലൂക്ക് യൂണിയനാണ് ഇത് സംബന്ധിച്ച പ്രമേയം പാസാക്കിയത്.
ഇക്കാര്യം ഉന്നയിച്ച് അധികാരികൾക്ക് നിവേദനം നൽകുന്നതിനും തീരുമാനിച്ചു. പ്രതിമ സ്ഥാപിക്കുന്നതിനുള്ള മുഴുവൻ ചിലവും സംഘടന വഹിക്കുമെന്നും യോഗത്തിൽ തീരുമാനമായി. രാവിലെ ഗുരുവായൂർ കിഴക്കേ നടയിൽ മഞ്ജുളാലിന് സമീപം പ്രത്യേകം തയ്യാറാക്കിയ മണ്ഡപത്തിൽ ആചാര്യന്റെ ഛായാചിത്രത്തിനു മുന്നിൽ നിലവിളക്കു കൊളുത്തി, പുഷ്പാർച്ചന നടത്തി ഗ്ലോബൽ നായർ സർവീസ് സൊസൈറ്റി സംസ്ഥാന പ്രസിഡന്റ് ഐ. പി.രാമചന്ദ്രൻ പരിപാടികൾ ഉദ്ഘാടനം ചെയ്തു.
ചാവക്കാട് താലൂക്ക് ഗ്ലോബൽ എൻഎസ്എസ് പ്രസിഡന്റ് കെ. ടി. ശിവരാമൻ നായരുടെ അധ്യക്ഷതയിൽ ചേർന്ന യോഗത്തിൽ ഗുരുവായൂർ ദിനവാർത്ത മാനേജിങ് ഡയറക്ടർ അഡ്വ. രവി ചങ്കത്ത് മുഖ്യാതിഥിയായി പങ്കെടുത്തു. താലൂക്ക് യൂണിയൻ വൈസ് പ്രസിഡന്റ് കെ. വേണുഗോപാൽ, സെക്രട്ടറി വിനോദ്, യൂണിയൻ അംഗങ്ങളായ ശ്രീധരൻ മാമ്പുഴ, രവീന്ദ്രൻ വട്ടരങ്ങത്ത് വനിതാ വേദി പ്രസിഡന്റ് കെ. സരസ്വതി ടീച്ചർ, ബീനാ രാമചന്ദ്രൻ, മണി. ജി. മേനോൻ എന്നിവർ പ്രസംഗിച്ചു. സംസ്ഥാന സെക്രട്ടറി മധു. കെ. നായർ അനുസ്മരണ പ്രഭാഷണം നടത്തി.
