ജന്മദിനം ആഘോഷിക്കുവാൻ ഇഷ്ടപ്പെടാത്തവരായി ആരുണ്ട് അല്ലേ.. പ്രായമെത്രയായാലും ജന്മദിനം ആഘോഷിക്കാൻ ഇഷ്ടപ്പെടുന്നവരാണ് നമ്മളിൽ ഭൂരിഭാഗം പേരും.ജപ്പാൻ കാരിയായ കാനെ ടനാകെയും കഴിഞ്ഞ ദിവസം അവരുടെ പിറന്നാൾ ആഘോഷിച്ചു.എന്താണിതിനിത്ര പ്രത്യേകത എന്നല്ലേ..?ഇന്ന് ജീവിച്ചിരിക്കുന്നവരിൽ ഏറ്റവും കൂടുതൽ ജന്മദിനം ആഘോഷിച്ച വ്യക്തിയാണ് ജപ്പാൻകാരിയായ കാനെ ടനാകാ.
നമ്മളിൽ ചിലരെങ്കിലും അവരെ കുറിച്ച് കേട്ടുകാണും. അതെ ലോകത്തെ ഏറ്റവും പ്രായം കൂടിയ വ്യക്തിയെന്ന ബഹുമതിയ്ക്ക് ഉടമയായ ആ കാനെ ടനാകെ തന്നെയാണ് ഈ പിറന്നാളുകാരി.119 വയസാന് കാനെ ടനാകെയ്ക്ക് ഇപ്പോൾ പ്രായം. 2022 ജനുവരി 2 നാണ് അവർ തന്റെ നൂറ്റി പത്തൊൻപതാം ജന്മദിനം ആഘോഷിച്ചത്. ലോകത്തെ ഏറ്റവും പ്രായം കൂടിയ വ്യക്തിയ്ക്കുള്ള ഗിന്നസ് വേൾഡ് റെക്കോർഡ് കാനെ ടനാകായ്ക്ക് സ്വന്തം. തന്റെ നൂറ്റിപതിനാറാമത്തെ വയസ്സിൽ 2019 മാർച്ചിലാണ് അവർ ഗിന്നസ് റെക്കോർഡ് കരസ്ഥമാക്കിയത്.
ലോകം മുഴുവൻ പുതുവർഷത്തെ വരവേറ്റപ്പോൾ തന്റെ നൂറ്റിപത്തൊന്പതാമത്തെ ജന്മദിനം ആഘോഷിക്കുകയായിരുന്നു കാനെ ടനാകാ. നൂറ്റിപത്തൊൻപത് വർഷത്തെ ജീവിതത്തിന്റെ പ്രതീകമായി നൂറ്റി പത്തൊൻപത് മെഴുകുതിരികൾ കത്തിച്ച് കേക്ക് മുറിച്ചുകൊണ്ടാണ് അവർ പുതുവർഷത്തെ വരവേറ്റത്. നൂറ്റി ഇരുപത് വർഷം ജീവിക്കുക എന്നതാണ് ഇപ്പോൾ അവർക്ക് മുന്നിലുള്ള ലക്ഷ്യം. തന്റെ നൂറ്റിയിരുപത്താമത്തെ ജന്മദിനത്തിനായി ആവേശത്തോടെ കാത്തിരിക്കുകയാണെന്ന് പിറന്നാൾ ആഘോഷത്തിനിടെ കാനെ ടനാകെ പറഞ്ഞു.
ഒന്നാം ലോകമഹായുദ്ധത്തിന് ഏകദേശം 11 വർഷം മുമ്പാണ് കാനെ ടനാകാ ജനിച്ചത്. കൃത്യമായി പറഞ്ഞാൽ 1903ൽ. റൈറ്റ് സഹോദരന്മാർ ലോകത്തിലെ ആദ്യത്തെ വിമാനം പറത്തിയ അതേ വർഷം. 117 വയസ്സും 261 ദിവസവും പ്രായമുള്ളപ്പോൾ ആണ് കാനെ ടനാകാ ലോകത്തിൽ ഇന്ന് ജീവിച്ചിരിക്കുന്ന ഏറ്റവും പ്രായം കൂടിയ ജാപ്പനീസ് വ്യക്തിയായി അംഗീകരിക്കപ്പെട്ടത്. പിന്നീട് ഔദ്യോഗികമായി ലോകത്തിലെ ഏറ്റവും പ്രായം കൂടിയ വ്യക്തിയായി അവർ മാറി. ഫുകുവോക്കയിലെ ഒരു നഴ്സിംഗ് ഹോമിലാണ് ഇപ്പോൾ കാനെ ടനാകാ ജീവിക്കുന്നത്. തന്റെ ജന്മദിനം നഴ്സിംഗ് ഹോമിലെ ജീവനക്കാരോടൊപ്പമാണ് അവർ ആഘോഷിച്ചത്.
തന്റെ ഏറ്റവും പ്രിയപ്പെട്ട പാനീയമായ കൊക്കോകോളയും ആഘോഷവേളയിൽ കാനെ ടനാകാ കൈയിൽ കരുതിയിരുന്നു. കൊക്കോകോള കമ്പനി കാനെ ടനാകായുടെ താത്പര്യം മനസിലാക്കി പ്രത്യേകമായി തയ്യാറാക്കിയ കൊക്കകോള അവരുടെ ജന്മദിനത്തിൽ സമ്മാനിക്കുകയും ചെയ്തു. തന്റെ പത്തൊൻപതാം വയസ്സിൽ 1922ലാണ് കാനെ ടനാകാ വിവാഹിതയാകുന്നത്. ഹിഡിയോ എന്ന വ്യക്തിയെ വിവാഹം ചെയ്ത കാനെ ഭർത്താവുമായി ചേർന്ന് തനക മോച്ചിയ എന്ന പേരിൽ ഒരു നൂഡിൽസ് ഷോപ്പ് ആരംഭിച്ചു. നൂഡിൽസിന് പുറമെ സെൻസായി, ഉഡോൺ എന്നീ വിഭവങ്ങളും വില്പന ചെയ്തു.
യുദ്ധങ്ങൾ കൊടുമ്പിരി കൊണ്ടിരുന്ന കാലഘട്ടമായിരുന്നു അത്. രണ്ടാം ചൈന-ജാപ്പനീസ് യുദ്ധത്തിൽ പങ്കെടുത്ത പോരാളികളിൽ കാനെയുടെ ഭർത്താവും മൂത്ത മകനും ഉൾപ്പെടുന്നു. കൊറോണ നിയന്ത്രണങ്ങൾ നിലനിൽക്കുന്നത് കാരണം കാനെയ്ക്ക് അവരുടെ കുടുംബവുമായി വളരെ പരിമിതമായേ ബന്ധപ്പെടാൻ സാധിക്കുന്നുള്ളൂ. അവരുടെ ജന്മദിനത്തിൽ 62കാരനായ, കാനെ ടനാകായുടെ ചെറുമകൻ എയ്ജി ടനാകാ മുത്തശ്ശിക്ക് ജന്മദിനാശംസകൾ നേർന്നിരുന്നു. മുത്തശ്ശിയെക്കുറിച്ചോർത്ത് അഭിമാനിക്കുന്നുവെന്നും ഓരോ ദിവസവും അവർക്ക് ആരോഗ്യത്തോടെ ജീവിതം ആസ്വദിക്കാൻ കഴിയട്ടെ എന്ന് ആശംസിക്കുന്നുവെന്നും എയ്ജി ടനാകാ പറഞ്ഞു. വെബ് ഡെസ്ക ജനം ടിവി ഡോട്ട് കോം
Comments