ഭോപ്പാൽ: മുടി വെട്ടാനും മീശ ട്രിം ചെയ്യാനും വിസമ്മതിച്ച പോലീസ് കോൺസ്റ്റബിളിനെ സസ്പെൻഡ് ചെയ്തു. മദ്ധ്യപ്രദേശിലെ സംസ്ഥാന പോലീസിന്റെ ട്രാൻസ്പോർട്ട് വിഭാഗത്തിൽ ഡ്രൈവറായി നിയമിക്കപ്പെട്ട കോൺസ്റ്റബിൾ രാകേഷ് റാണയെയാണ് സസ്പെൻഡ് ചെയ്തത്. രാകേഷ് റാണയുടെ മീശ മറ്റ് ജീവനക്കാരിൽ മോശം അഭിപ്രായം സൃഷ്ടിക്കുന്നുവെന്ന് ഉത്തരവിൽ പറയുന്നു.
രാകേഷ് റാണയ്ക്കെതിരെ സഹപ്രവർത്തകരിൽ നിന്നും വ്യാപക പരാതികൾ ലഭിച്ചു. സംഭവത്തിൽ കാരണം കാണിക്കൽ നോട്ടീസ് റാണയ്ക്ക് നൽകിയിരുന്നു. എന്നാൽ മുതിർന്ന ഉദ്യോഗസ്ഥന്റെ ഉത്തരവിൽ റാണ പ്രതികരിച്ചില്ല. തുടർന്നാണ് ഇയാൾക്കെതിരെ നടപടി സ്വീകരിച്ചതെന്ന് അസിസ്റ്റന്റ് ഇൻസ്പെക്ടർ ജനറൽ പ്രശാന്ത് ശർമ്മ പറഞ്ഞു.
അതേസമയം മീശ മുറിയ്ക്കില്ലെന്ന നിലപാടാണ് രാകേഷ് റാണയ്ക്കുള്ളത്. ‘ ഞാനൊരു രജ പുത്രനാണ്, എന്റെ മീശ എന്റെ അഭിമാനമാണ്. അതിനാൽ തന്നെ ജോലി പോയാലും മീശയുടെ കാര്യത്തിൽ വിട്ടുവീഴ്ച്ച ചെയ്യില്ല’ എന്നാണ് റാണയുടെ വാദം.
