മസ്ക്കറ്റ് : പെട്രോളിയം രംഗത്തെ പ്രമുഖ വ്യവസായിയായ സുരേഷ് ബി നായർക്ക് ഒമാൻ സർക്കാരിന്റെ ഗോൾഡൻ വിസ ആദരം. കഴിഞ്ഞ നാല് പതിറ്റാണ്ടിലേറെയായി ഒമാനിൽ പെട്രോളിയം രംഗത്തെ ബിസിനസ്സ് സാന്നിദ്ധ്യമാണ് അദ്ദേഹം. ഇത് പരിഗണിച്ചാണ് ഗോൾഡൻ വിസ നൽകി ആദരിച്ചത്.
എനർജി മെഷീൻ സർവ്വീസസ് കമ്പനിയുടെ ഉടമയാണ് കഴിഞ്ഞ 41 വർഷമായി ഒമാനിലുള്ള സുരേഷ് നായർ. 15 വർഷത്തോളം പെട്രോളിയം ഡെവലപ്മെന്റ് ഒമാൻ കമ്പനിയിൽ പ്രവർത്തിച്ചശേഷമാണ് 1994 ൽ എനർജി മെഷീൻ സർവ്വീസസ് എന്ന കമ്പനി സ്ഥാപിക്കുന്നത്. പിഡിഒ, റിഫൈനറി, പവർ സ്റ്റേഷൻ എന്നീ വിവിധ മേഖലയിലെ ജോലികളുടെ അനുബന്ധമായ മെഷീനുകളുടെ വിതരണം, പരിപാലനം, 40 ൽപരം പവർ സ്റ്റേഷനുകളുടെ മെയിന്റനസ് എന്നിവ നടത്തുന്ന സ്പീഡ് എനർജി സർവ്വീസസ്, എംജെബി എനർജി സർവ്വീസസ് എന്നീ മറ്റു രണ്ടു കമ്പനികളുടെയും ഉടമയാണ്.
ഇൻഡ്യൻ സോഷ്യൽക്ലബ്ബ് മലയാളവിഭാഗത്തിന്റെ സ്ഥാപക കൺവീനറും പൊതുപ്രവർത്തകനുമാണ്. എറണാകുളം ചേന്ദമംഗലം സ്വദേശിയാണ് സുരേഷ് ബി നായർ. ഭാര്യ മോഹന പാലിയം കുടുംബാംഗവും. മക്കളായ വിവിനും കീർത്തിയും അമേരിക്കയിൽ സ്ഥിരതാമസക്കാരാണ്.
Comments