ജീവിച്ചിരിക്കുന്നവരിൽ ഏറ്റവും പ്രായമുള്ളത് ആർക്കാണെന്നറിയാമോ.. ഗിന്നസ് ലോക റെക്കോർഡിൽ ഇടം പിടിച്ച ജോനാതനാണ് കരയിൽ ജീവിക്കുന്ന ഏറ്റവും പ്രായമുള്ള ജന്തു. 190 വയസ് പിന്നിട്ട ജോനാതൻ ലോകത്തിലെ ഏറ്റവും പ്രായമേറിയ ആമയാണ്. ഇപ്പോൾ ജോനാതനെ പരിപാലകർ കുളിപ്പിച്ച് സുന്ദരനാക്കുന്ന വീഡിയോ പുറത്തുവിട്ടിരിക്കുകയാണ് ഗിന്നസ് അധികൃതർ.
1832ലാണ് ജോനാതൻ എന്ന ആമയുടെ ജനനം. ബ്രിട്ടീഷ് ഭൂപ്രദേശത്ത് ഉൾപ്പെടുന്ന സെന്റ് ഹെലേന ദ്വീപിലാണ് ഇപ്പോൾ ജോനാതനുള്ളത്. ജോനാതന്റെ ജനനത്തെക്കുറിച്ച് ഏകദേശ കണക്ക് മാത്രമാണ് നിലവിലുള്ളത്. കാരണം ജോനാതന്റെ ജനന സമയത്തുണ്ടായിരുന്ന ആരും തന്നെ ഇപ്പോൾ ജീവിച്ചിരിപ്പില്ലെന്നത് തന്നെയാണ് പ്രധാന കാരണം.
190 പിന്നിടുമ്പോൾ ജോനാതന് കാഴ്ചശക്തിയോ ഘ്രാണശക്തിയോ ഒന്നും തന്നെയില്ല. അതുകൊണ്ട് തന്നെ വെറ്ററിനറി ജീവനക്കാരാണ് ആമയെ പരിപാലിക്കുന്നത്. കൃത്യമായ ഇടവേളകളിൽ ഇവർ ഭക്ഷണം നൽകും. കാബേജ്, കുക്കുംബർ, കാരറ്റ്, ആപ്പിൾ, ബനാന എന്നിവയെല്ലാമാണ് ജോനാതന്റെ ഇഷ്ടഭക്ഷണം.
ആഴ്ചയിലൊരിക്കലാണ് ജോനാതൻ ഭക്ഷണം കഴിക്കുക. ഈ ആഹാരത്തിൽ ജോനാതന്റെ നിലനിൽപ്പിന് ആവശ്യമായ കലോറികൾ, വൈറ്റമിനുകൾ, മിനറലുകൾ എന്നിവയെല്ലാം ഉൾപ്പെടുത്തിയിരിക്കും. ജോനാതന് കാഴ്ച-ഘ്രാണ ശക്തികൾ നഷ്ടപ്പെട്ടെങ്കിലും കേൾവി ശക്തിക്ക് കേടുപാടുകൾ സംഭവിച്ചിട്ടില്ല. അതുകൊണ്ട് തന്നെ മനുഷ്യരുമായി ഇടപെടുന്നത് ജോനാതന് ഇഷ്ടമാണ്. ജോ ഹോളിൻ എന്ന വെറ്ററിനേറിയനാണ് ജോനാതന്റെ പ്രിയ ചങ്ങാതി.
ജോനാതൻ ഗിന്നസിൽ ഇടംനേടുന്നതിന് മുമ്പ് ആ നേട്ടം കൈവരിച്ചത് ടു മലില എന്ന ആമയായിരുന്നു. ടോങ്കയിലെ രാജകുടുംബത്തിന് ക്യാപ്റ്റൻ കുക്ക് സമ്മാനിച്ചതായിരുന്നു മലിലയെ. 188 വയസുവരെ ജീവിച്ച മലില 1965ലാണ് മരണമടയുന്നത്.
