കടലില്‍ അഗ്നിപര്‍വ്വത സ്‌ഫോടനമുണ്ടായതിനെ തുടര്‍ന്ന് രൂപപ്പെട്ട സുനാമിയില്‍ തകര്‍ന്ന ടോംഗ ദ്വീപ് പൂര്‍വ്വസ്ഥിതി കൈവരിക്കുക ഏറെ ശ്രമകരമാകും. ടോംഗ വിമാനത്താവളത്തില്‍ കുമിഞ്ഞ അവശിഷ്ടങ്ങള്‍ ദുരന്തത്തിന്റെ വ്യാപ്തി വ്യക്തമാക്കുന്നു. ഇത് ദുരന്തനിവാരണപ്രവര്‍ത്തനങ്ങള്‍ തടസ്സപ്പെടുത്തുന്നുണ്ട്.
ന്യൂസിലന്‍ഡ് ദ്വീപിലേക്ക് കുടിവെള്ളവും മറ്റ് വസ്തുക്കളും അയച്ചെങ്കിലും പ്രധാനവിമാനത്താവളത്തില്‍ വിമാനമിറങ്ങാന്‍ കഴിയാത്തത് പ്രതിസന്ധിക്ക് കാരണമാകുന്നുണ്ട്. ടോംഗയിലെ അതിര്‍ത്തി ദ്വീപുകളില്‍ കാര്യമായ തകര്‍ച്ച നേരിട്ടിട്ടുണ്ട്. രണ്ടുപേര്‍ മരിച്ചതായി സ്ഥിരീകരണമുണ്ടെങ്കിലും യഥാര്‍ത്ഥ സംഖ്യഉയരാനിടയുണ്ട്. ആശയവിനിമയം സാധ്യമാകാത്തതിനാല്‍ ദുരന്തത്തിന്റെ വ്യാപ്തി സംബന്ധിച്ച് വ്യക്തമായ വിവരങ്ങള്‍ ലഭ്യമല്ല.
തെക്കന്‍ പസഫിക്‌മേഖലയില്‍ ജപ്പാനോളം വലുപ്പത്തില്‍ ചിതറിക്കിടക്കുന്ന 170 ദ്വീപ് സമൂഹങ്ങള്‍ ചേര്‍ന്ന ടോംഗായില്‍ ഒരു ലക്ഷത്തിനു മുകളില്‍ ജനസംഖ്യയുണ്ട്. ഇതില്‍ ഭൂരിപക്ഷവും കേന്ദ്രീകരിച്ചത് പ്രധാനദ്വീപായ ടോംഗാടാപുവിലാണ്. ടോംഗാടാപുവിന്റെ പടിഞ്ഞാറന്‍ തീരത്ത് വലിയ നാശമുണ്ടായെന്ന് യുഎന്‍ റിപ്പോര്‍ട്ട് ചെയ്യുന്നു.
ഒരു ദ്വീപിലെ മുഴുവന്‍ വില്ലേജുകളും തകര്‍ന്നതായും മറ്റൊരു ദ്വീപിലെ കെട്ടിടങ്ങള്‍ നിലംപൊത്തിയതായും നിരീക്ഷകവിമാനങ്ങള്‍ കണ്ടെത്തിയതായും റിപ്പോര്‍ട്ടുണ്ട്. ഓസ്‌ട്രേലിയയും ന്യൂസിലന്‍ഡും നിരീക്ഷകവിമാനങ്ങള്‍ അയച്ച് സ്ഥിതിഗതികള്‍ വിലയിരുത്തുന്നുണ്ട്. കൂടുതല്‍ മരണങ്ങള്‍ സംഭവിക്കാന്‍ ഇടയുണ്ടെന്നും പ്രാര്‍ത്ഥിക്കുകയല്ലാതെ മറ്റൊന്നും ചെയ്യാനില്ലെന്നും ടോംഗായിലെ ഉന്നത ഉദ്യോഗസ്ഥന്‍ കുര്‍ത്തിസ് ടുയ്ഹാലന്‍ഗിന്‍ഗി വ്യക്തമാക്കി.
അഗ്നിപര്‍വ്വതവും സുനാമിയും ടോംഗയിലെ വെള്ളത്തിന്റെ ലഭ്യതതടസ്സപ്പെടുത്തിയതിനാല്‍ കുടിവെള്ളത്തിനാണ് ടോംഗയില്‍ മുന്‍ഗണനയെന്നും ന്യൂസിലന്‍ഡ് വിദേശകാര്യമന്ത്രി നനൈയ് മുഹുത്ത പറഞ്ഞു.
സുനാമിത്തിരകള്‍ കൊണ്ടുവന്ന അഗ്നിപര്‍വ്വത അവശിഷ്ടങ്ങള്‍ ടോംഗയുടെ ഹരിതാഭയെ ഇല്ലാതാക്കി ചെളികലര്‍ന്ന തവിട്ടുനിറമാക്കി. ഈ അവശിഷ്ടങ്ങള്‍ മാറ്റിയാലെ വിമാനമിറങ്ങുന്നതിനു സാധിക്കൂവെന്നും അദ്ദേഹം വ്യക്തമാക്കി. ഒരുകൂട്ടം ടോംഗവാസികള്‍ റണ്‍വേ ശുചീകരിക്കുന്ന ദൗത്യം ഏറ്റെടുത്തു നടപ്പാക്കുന്നുണ്ട്. ബുധനാഴ്ച വരെ ശുചീകരണം നീണ്ടേക്കുമെന്നും അദ്ദേഹം പറഞ്ഞു.
