കണ്ണൂർ ; സിപിഎമ്മിന്റെ പാർട്ടി കോൺഗ്രസ് സംഘാടക സമിതി ഓഫീസിൽ ചാനൽ റിപ്പോർട്ടർമാർ തമ്മിൽ അടിച്ചതായി റിപ്പോർട്ട് . ഏഷ്യാനെറ്റ് ന്യൂസ് റിപ്പോർട്ടർ നൗഫലും മീഡിയ വൺ റിപ്പോർട്ടർ സുനിൽ ഐസക്കും തമ്മിൽ സംഘർഷമുണ്ടായതായി ദേശാഭിമാനിയാണ് റിപ്പോർട്ട് ചെയ്തത് .
കഴിഞ്ഞ ദിവസമായിരുന്നു സംഘാടക സമിതി ഓഫീസ് തുറന്നത്. സിപിഎം സംസ്ഥാന സെക്രട്ടറി കോടിയേരി ബാലകൃഷ്ണനായിരുന്നു ഉദ്ഘാടനം . പ്രസംഗത്തിന് ശേഷം കോടിയേരിയോട് മാദ്ധ്യമപ്രവർത്തകർ ചോദ്യങ്ങളുമായി എത്തി .
ഇതിനിടെ പാർട്ടി കോൺഗ്രസ് മാറ്റിവെക്കുമോ? എന്ന് മീഡിയ വൺ റിപ്പോർട്ടർ ചോദ്യം ഉന്നയിച്ചു. ഇതാണ് സംഘർഷത്തിന് കാരണമാക്കിയത് .
പാർട്ടി കോൺഗ്രസ് മാറ്റിവെക്കാനാണോ സംഘാടക സമിതി ഓഫീസ് തുറന്നതെന്നായിരുന്നു കോടിയേരിയുടെ മറുചോദ്യം . എന്നാൽ ഒരു ചാനലിൽ ഇത്തരത്തിൽ ബ്രേക്കിങ് പോകുന്നുണ്ടെന്ന് റിപ്പോർട്ടർ മറുപടി നൽകി . ഏത് ചാനലാണെന്ന് കോടിയേരി തിരക്കിയപ്പോൾ ഏഷ്യാനെറ്റ് ന്യൂസ് ആണെന്ന് റിപ്പോർട്ടർ മറുപടി നൽകി .
ഇതോടെ ഏഷ്യാനെറ്റ് ന്യൂസുകാർ ഞങ്ങളുടെ പോളിറ്റ് ബ്യൂറോയിലുണ്ടോ എന്ന് കോടിയേരി ചോദിച്ചു. ഇതോടെ പലരും പരിഹസിക്കുകയും ചെയ്തു . എന്നാൽ ചടങ്ങ് കഴിഞ്ഞ് എല്ലാവരും പിരിഞ്ഞു പോകാനിരിക്കെ ഏഷ്യാനെറ്റ് ന്യൂസ് റിപ്പോർട്ടർ മീഡിയവൺ റിപ്പോർട്ടറെ തടഞ്ഞ് നിർത്തി തന്നെ പരിഹസിച്ചതിനെ ചോദ്യം ചെയ്തു . ഇത് പിന്നീട് കൈയ്യാങ്കളിയിലേക്ക് നീങ്ങുകയായിരുന്നു. പരസ്പരം വാക്കുതർക്കത്തിന് ശേഷമാണ് അടി നടന്നത്.
Comments