കൊച്ചി: സമൂഹമാദ്ധ്യമങ്ങളിൽ ശ്രദ്ധേയമാകുകയാണ് ശങ്കു ടി ദാസിന്റെ മേപ്പടിയാൻ വിലയിരുത്തൽ. ഉണ്ണി മുകുന്ദൻ ആണ് മേപ്പടിയാൻ എന്ന സിനിമ. അതിന്റെ ആകെ മേൽവിലാസം തന്നെ ഉണ്ണി മുകുന്ദന്റെ സിനിമ എന്നതാണ്. ആദ്യ ഷോട്ട് മുതൽ അവസാന ഷോട്ട് വരെ അയാളാണ് ആ സിനിമയെ കൊണ്ട് നടക്കുന്നത്. ശങ്കു ടി ദാസ് ഫേസ്ബുക്കിലിട്ട കുറിപ്പിൽ പറയുന്നു.
‘മലയാള സിനിമാ മേഖലയിലെ അനവധി അഭിനേതാക്കളിൽ ഒരാൾ’ എന്ന സാമാന്യതയിൽ നിന്ന് ‘മലയാളം ഫിലിം ഇൻഡസ്ട്രിയിലെ വിപണി മൂല്യമുള്ള ഒരു താരം’ എന്ന പദവിയിലേക്കുള്ള ഉണ്ണി മുകുന്ദൻ എന്ന നടന്റെ അത്ഭുതകരമായ പരിണാമമാണ് ‘മേപ്പടിയാൻ’.
ഇതയാളുടെ ആദ്യ സിനിമയല്ല. ആദ്യ നായക വേഷവുമല്ല. ഉണ്ണി മുകുന്ദൻ എന്നയാളെ പത്തോ പന്ത്രണ്ടോ കൊല്ലമായി നമുക്കൊക്കെ അറിയാം. എത്രയോ സിനിമകളിലും ടെലിവിഷൻ പരിപാടികളിലും അഭിമുഖങ്ങളിലും ഫീച്ചറുകളിലും റിയാലിറ്റി ഷോകളിലും നമ്മളയാളെ പല വട്ടം കണ്ടിട്ടുണ്ട്. പക്ഷെ ഇതിന് മുൻപൊരിക്കലും ഇത്ര കാര്യമായി നമ്മളയാളെ പറ്റി ചർച്ച ചെയ്തിട്ടില്ല. ഇത്ര ഗൗരവത്തിൽ അയാളെ പരിഗണിച്ചിട്ടുമില്ല. കാണാൻ കൊള്ളാവുന്ന ചെക്കനാണ്. സംസാരം കേൾക്കാൻ രസമാണ്. നല്ല ബോഡിയാണ്. ചിരി ക്യൂട്ട് ആണ്. അങ്ങനെയുള്ള ലളിത യുക്തികൾക്കപ്പുറം നമ്മളയാളെ ഒരു നടനെന്ന നിലയിൽ മുൻപ് വിലയിരുത്തിയിട്ടേയില്ല.
അയാളുടെ പ്രതിഭയേയോ പോരായ്മകളെയോ പറ്റി ഇഴകീറിയുള്ള വിശകലനങ്ങൾക്കൊന്നും മുതിർന്നിട്ടില്ല. ശരിയാണ്, നമ്മൾ അയാളുടെ അനവധി സിനിമകൾ കണ്ടിട്ടുണ്ട്.
പക്ഷെ സത്യമായും, അയാളെ കാണാൻ വേണ്ടി ഒരു സിനിമയും നമ്മൾ കണ്ടിട്ടില്ല.
മോഹൻലാലിന്റെയോ മമ്മൂട്ടിയുടെയോ പൃഥ്വിരാജിന്റെയോ ദുൽക്കർ സൽമാന്റെയോ സിനിമ കാണാൻ കേറിയപ്പോൾ കൂട്ടത്തിൽ അയാളെയും നമ്മൾ കണ്ടതാണ്.
വേറെന്തൊക്കെയോ കാരണങ്ങൾ കൊണ്ട് കാണാൻ തീരുമാനിച്ച പല സിനിമകളിലും അയാളും യാദൃശ്ചികമായി ഉണ്ടായി പോയതാണ്. അല്ലാതെ അയാളൊരിക്കലും ഒറ്റക്കൊരു സിനിമ ആയിരുന്നിട്ടില്ല. ഒരു സിനിമയിലെ ടൈറ്റിൽ കാരക്ടർ ആയപ്പോൾ പോലും ആ സിനിമയെ സ്വന്തം തോളിൽ ഏറ്റിയിരുന്നുമില്ല. എന്നാൽ ആ കഥ മാറുകയാണ് മേപ്പടിയാനിലൂടെ.
പുഴുവാണെന്ന് കരുതിയ ലാർവ പ്യൂപ്പയും പിന്നെ പൂമ്പാറ്റയും ആകുന്നത് പോലെ നമ്മുടെ കണ്മുന്നിൽ അയാൾ സ്വയം ചിത്രശലഭമായി ചിറകു വിരിക്കുകയാണ്. ക്രിസലിസ് എന്ന് തന്നെ വിശേഷിപ്പിക്കാവുന്ന പരിണാമം ആണത്. വിശ്വരൂപ പ്രദർശനം പോലൊരു വിസ്മയാവതാരമാണ്.
അയാളിലൂടെയാണ് ആ സിനിമ സഞ്ചരിക്കുന്നത്. അയാളെ കാണാനാണ് ആളുകൾ ആ സിനിമക്ക് കേറുന്നത്. അയാളുടെ തോളിലല്ല, നെഞ്ചിലാണ് ആ സിനിമയെ ഏറ്റിയിരിക്കുന്നത്. അതൊരു വിജയമാകുമ്പോൾ ജയിക്കുന്നത് ഉണ്ണി മുകുന്ദൻ എന്ന നടൻ തന്നെയാണ്.
ഉണ്ണി മുകുന്ദൻ എന്നൊരു പോപ്പുലർ ബ്രാൻഡിന്റെ ഉദയമാണത്. അതൊരു ചെറിയ കാര്യമല്ല. സ്വപ്ന തുല്യമാണ് ആ പരിണാമം. മലയാള സിനിമയിലെ ഒരു സാന്നിധ്യം എന്നതിൽ നിന്നൊരാൾ സ്വയം ഒരു മലയാളം സിനിമയാവുകയാണ്.
സ്വന്തം പേര് കൊണ്ട് ഒരു സിനിമ ജയിപ്പിക്കാൻ പറ്റുന്ന ഒരു താര പ്രതിഭാസമായി മാറുകയാണ്. അയാൾ തനിക്ക് വേണ്ടി സിനിമ നിർമ്മിക്കുന്നു. അയാൾ തന്നെ അതിൽ മുഖ്യ കഥാപാത്രമായി അഭിനയിക്കുന്നു. അയാൾ തന്നെ അത് പ്രമോട്ട് ചെയ്യുന്നു.
അയാളുടെ ബലത്തിൽ തന്നെയത് ഹിറ്റ് ആക്കി മാറ്റുന്നു. അതിന് വലിയ സ്വീകാര്യത ഉറപ്പാക്കുന്നു. അത് സമൂഹത്തിൽ വലിയ ചർച്ച ആക്കി മാറ്റുന്നു. അയാൾക്ക് ആരാധകരും വിമർശകരും ഉണ്ടാവുന്നു. അയാളെ കണ്ടിരിക്കാൻ ആളുകൾ കാശ് മുടക്കുന്നു. അയാൾക്കൊപ്പം ചിരിക്കുകയും കരയുകയും ആശങ്കയനുഭവിക്കുകയും ആശ്വസിക്കുകയും ചെയ്യുന്നു. അയാളെ ഗൗരവത്തോടെ വിലയിരുത്തുന്നു. അയാളുടെ വ്യക്തി ജീവിതവും രാഷ്‌ട്രീയ നിലപാടുകളും പോലും ഇഴകീറി പരിശോധിക്കപ്പെടുന്നു.
ഉണ്ണി മുകുന്ദൻ എന്ന ഫെനോമിനൻ മലയാളിയുടെ ഒരു പ്രധാന വിഷയമാകുന്നു.
ഒരു നടന് ആഗ്രഹിക്കാവുന്നതിന്റെ അങ്ങേയറ്റമുള്ള റേഞ്ച് ആണത്.
അവിടെ എത്തിയവരും അവിടെയെത്താൻ ശ്രമിക്കുന്നവരും എന്ന് അഭിനേതാക്കളെ പൊതുവിൽ തന്നെ രണ്ടായി തരം തിരിക്കാം. ആ ഉത്തരവാദിത്വം അയാൾ അത്രമേൽ കയ്യടക്കത്തോടെ നിർവഹിക്കുകയും ചെയ്തിട്ടുണ്ട്.
ഒരു പ്രെസൻസ് എന്നതിൽ നിന്ന് പെർഫോമർ എന്ന നിലയിലേക്ക് ഉണ്ണി മുകുന്ദൻ പീലി വിടർത്തുന്നത് നമ്മുടെ കണ്മുന്നിലാണ്. കണ്ട് പരിചയമുള്ള ഉണ്ണി മുകുന്ദൻ എന്നയാ പഴയ ഓർമയെ പോലും ഊരിയെറിഞ്ഞു ജയകൃഷ്ണൻ എന്ന കഥാപാത്രത്തിലേക്ക് സന്നിവേശിച്ച അയാളുടെ പകർന്നാട്ടം വിസ്മയാവഹമാണ്. ആ നാട്ടിമ്പുറത്തെ ചെറുപ്പക്കാരന്റെ നൈർമ്മല്യവും നിസ്സഹായതയും ധർമ്മ സങ്കടങ്ങളും രോഷവും ഒക്കെ അയാളിൽ അത്ര ഭദ്രമാണ്.
ഒരർത്ഥത്തിൽ മേപ്പടിയാന്റെ ക്ലൈമാക്സിലെ ജയകൃഷ്ണന്റെ മെറ്റമോർഫോസിസ് കാവ്യാത്മകവും പ്രവാചക സ്വഭാവമുള്ളതുമാണ്. അതൊരുപക്ഷെ ഉണ്ണി മുകുന്ദൻ എന്ന നടന്റെ തന്നെ രൂപാന്തരത്തിന്റെ കഥയാണ്. ആ പുതിയ ഉണ്ണിയുടെ അടയാളപ്പെടുത്തലാണ്, അഥവാ വിളംബരമാണ്, മേപ്പടിയാൻ. മേപ്പടിയാന് മുൻപും പിൻപും എന്നാണ് അയാളുടെ കരിയർ ചരിത്രത്തിൽ ഭാഗിക്കപ്പെടാൻ പോവുന്നത്.
