ഹൈദരാബാദ്: അന്തരിച്ച കന്നഡ നടൻ പുനീത് രാജ്കുമാർ ആരാധകർ ഏറെ ആകാംക്ഷയോടെ കാത്തിരുന്ന ചിത്രമായിരുന്നു ‘ജെയിംസ്’. എന്നാൽ ചിത്രം തിയേറ്ററുകളിലേക്ക് എത്തുമ്പോഴേക്കും കന്നഡ സിനിമാപ്രേമികളുടെ പ്രിയതാരം ലോകത്തോട് വിടപറഞ്ഞിരുന്നു.
ഇപ്പോഴിതാ റിപ്പബ്ലിക് ദിനത്തോടനുബന്ധിച്ച് ചിത്രത്തിൽ പുനീത് അവതരിപ്പിക്കുന്ന ടൈറ്റിൽ കഥാപാത്രത്തിന്റെ ഒരു സ്പെഷ്യൽ പോസ്റ്റർ പങ്കുവച്ചിരിക്കുകയാണ് അണിയറപ്രവർത്തകർ. പുനീതിന്റെ സഹോദരനും നടനുമായ ശിവരാജ്കുമാറാണ് പോസ്റ്റർ ആദ്യം പങ്കുവെച്ചത്.യുദ്ധ പശ്ചാത്തലത്തിലുള്ള പോസ്റ്ററിൽ സൈനിക യൂണിഫോമിലാണ് പുനീത്. ആക്ഷൻ രംഗങ്ങൾക്ക് പ്രാധാന്യം നൽകി ഒരുക്കിയിരിക്കുന്ന ചിത്രമാണിത്.
പുനീതിന്റെ ജന്മദിനമായ മാർച്ച് 17നാണ് ജെയിംസ് എന്ന ചിത്രം തിയറ്ററിലെത്തുക. താരത്തോടുള്ള ആദരസൂചകമായാണ് കർണാടകയിൽ ഒരാഴ്ച പുതിയ കന്നഡ ചിത്രങ്ങൾ റിലീസ് ചെയ്യേണ്ടതില്ലെന്ന് ചലച്ചിത്ര പ്രവർത്തകരും വിതരണക്കാരും തീരുമാനിച്ചത്. ഇതോടെ മാർച്ച് 17 മുതൽ 23 വരെ ജെയിംസ് സോളോ റിലീസായി തിയറ്ററിലുണ്ടാകും. കന്നഡയിലെ പവർസ്റ്റാർ എന്നറിയപ്പെട്ടിരുന്ന പുനീത് രാജ്കുമാർ കഴിഞ്ഞ ഒക്ടോബറിലാണ് ഹൃദയാഘാതം വന്ന് മരണപ്പെട്ടത്. 46കാരനായ പുനീതിന്റെ മരണം കന്നഡ സിനിമ ലോകത്തെയാകെ കണ്ണീരിലാഴ്ത്തിയിരുന്നു.
ചേതൻ കുമാറാണ് ചിത്രത്തിന്റെ രചനയും സംവിധാനവും നിർവഹിച്ചിരിക്കുന്നത്. ഒരു പാട്ടും ആക്ഷൻ സീക്വൻസും ഒഴികെയുള്ള പ്രധാന ഭാഗങ്ങളെല്ലാം പൂർത്തിയാക്കിയ ശേഷമാണ് താരം വിടപറഞ്ഞത്. അനു പ്രഭാകർ, ശ്രീകാന്ത്, ആർ. ശരത്കുമാർ, തിലക് ശേഖർ, മുകേഷ് ഋഷി എന്നിവരാണ് ചിത്രത്തിലെ മറ്റു അഭിനേതാക്കൾ.
