പുത്തൻ ഭാവത്തിലും സ്റ്റൈലിലുമുള്ള ഇമോജികൾ പുറത്ത് വിട്ട് ആപ്പിൾ. ഗർഭമുള്ള പുരുഷനുൾപ്പെടെ 37 പുതിയ ഇമോജികളാണ് ആപ്പിൾ അവതരിപ്പിച്ചിരിക്കുന്നത്. ആപ്പിളിന്റെ ഐഒഎസ് 15.4 ബീറ്റ വേർഷനിലാണ് പുതിയ ഇമോജികൾ കാണാൻ സാധിക്കുന്നത്.
ഗർഭമുള്ള പുരുഷൻ എന്ന ആശയത്തിൽ നിന്നും ലിംഗ സമത്വം കൊണ്ടുവരണമെന്ന ലക്ഷ്യത്തോടെയാണ് ഈ ഇമോജി ഉൾപ്പെടുത്തിയതെന്ന് ആപ്പിൾ വ്യക്തമാക്കുന്നു. ഇക്കാര്യം സമൂഹമാദ്ധ്യമങ്ങളിൽ വലിയ ചർച്ചകൾക്കാണ് വഴി തെളിച്ചിരിക്കുന്നത്. ലിംഗ സമത്വം കൂടാതെ നിറത്തിന്റെ കാര്യത്തിലും തുല്യത കൊണ്ടുവരാനായി 75 പുതിയ സ്കിൻ ടോണുകളും ആപ്പിൾ അവതരിപ്പിച്ചിട്ടുണ്ട്. ഇതോടെ ആപ്പിളിന്റെ ആകെ ഇമോജികളുടെയും ക്യാരക്ടറുകളുടെയും എണ്ണം 112 ആയി.
സല്യൂട്ട്, കമഴ്ത്തി വെച്ചിരിക്കുന്ന കൈപ്പത്തി, മലർത്തി വെച്ചിരിക്കുന്ന കൈപ്പത്തി, തള്ളവിരലും, ചൂണ്ടുവിരലും ചേർത്ത് ഹൃദയത്തിന്റെ ആകൃതി കാണിക്കുന്ന ഇമോജി, ചുണ്ടു കടിക്കുന്ന ഇമോജി, ഒളികണ്ണിട്ട് നോക്കുന്ന ഇമോജി തുടങ്ങിയവയാണ് ആപ്പിൾ അവതരിപ്പിച്ചതിൽ ചിലത്. ഇതിന് പുറമെ, മുട്ടയുള്ളതും ഇല്ലാത്തതുമായ പക്ഷിക്കൂട്, എക്സ് റേ, മിറർ ബോൾ, ജാർ, തിരിച്ചറിയൽ കാർഡ്, കുമിളകൾ, ബാറ്ററി ലോ, ടയർ, വിവിധ സ്കിൻ ടോണുകളിലുള്ള കൈപ്പത്തികൾ കൊണ്ടുള്ള ഹാൻഡ് ഷേക്ക് എന്നിവയും പുതിയ ഇമോജി കൂട്ടത്തിലുണ്ട്.
Comments