ന്യൂയോർക്ക്: അഞ്ച് വയസിന് താഴെയുള്ള കുട്ടികളിൽ വാക്സിന്റെ അടിയന്തര ഉപയോഗത്തിന് അനുമതി തേടി വാക്സിൻ നിർമ്മാതാക്കളായ ഫൈസറും ബയോടെക്കും. ആറ് മാസം മുതൽ നാല് വയസ് വരെ പ്രായമുള്ള കുഞ്ഞുങ്ങളിൽ വാക്സിൻ ഉപയോഗിക്കുന്നതിനാണ് അനുമതി തേടിയത്. യുഎസ് ഫുഡ് ആൻഡ് ഡ്രഗ് അഡ്മിനിസ്ട്രേഷനിൽ നിന്ന് അനുമതി ലഭിക്കുന്ന മുറയ്ക്ക് കുട്ടികൾക്ക് വാക്സിൻ നൽകി തുടങ്ങും.
അനുമതി ലഭിച്ചാൽ അഞ്ച് വയസിന് താഴെ ഉള്ള കുട്ടികളുടെ ആദ്യത്തെ വാക്സിനായിരിക്കും ഫൈസർ- ബയോടെക്ക്. അനുമതി നൽകുന്നതുമായി ബന്ധപ്പെട്ട് യുഎസ് ഫുഡ് ആൻഡ് ഡ്രഗ് അഡ്മിനിസ്ട്രേഷൻ ഫെബ്രുവരി 15 ന് യോഗം ചേരും എന്നാണ് റിപ്പോർട്ട്.
അഞ്ച് വയസിന് താഴെയുള്ള നിരവധി കുട്ടികൾ കൊറോണ കാരണം ആശുപത്രികളിൽ കഴിയുന്നുണ്ട്. വാക്സിന് അനുമതി ലഭിച്ചാൽ കൊറോണ പോരാട്ടത്തിൽ വലിയ കുതിച്ച് ചാട്ടത്തിന് കാരണമാകുമെന്ന് കമ്പനികൾ വ്യക്തമാക്കി. കുഞ്ഞുങ്ങൾക്ക് കൂടുതൽ സംരക്ഷണം ഉറപ്പാക്കുന്നതിന് മൂന്ന് ഡോസ് വാക്സിൻ ആവശ്യമായി വരുമെന്നാണ് കമ്പനികളുടെ വിലയിരുത്തൽ.
കുഞ്ഞുങ്ങൾക്കുള്ള വാക്സിന് അനുമതി ലഭിക്കുകയാണെങ്കിൽ മാതാപിതാക്കൾക്ക് തങ്ങളുടെ കുട്ടികളെ കൊറോണയിൽ നിന്ന് സംരക്ഷിക്കാനുള്ള അവസരം ലഭിക്കുമെന്ന് ബയോടെക്കിന്റെ സഹസ്ഥാപകൻ ഉഗുർ സാഹിർ വ്യക്തമാക്കി.
