ബംഗലുരു: ഉഡുപ്പി കുന്ദാപ്പൂര്‍ ജൂനിയര്‍ കോളജില്‍ ഹിജാബ്-കാവിഷാള്‍ വിവാദംകത്തി നില്‍ക്കെ രണ്ടും കോളജില്‍ അനുവദിക്കില്ലെന്ന് ആഭ്യന്തര മന്ത്രി അരഗ ജ്ഞാനേന്ദ്ര. മതപരമായ വേര്‍തിരിവുകള്‍ കോളജില്‍ അനുവദിക്കില്ലെന്നും അദ്ദേഹം പറഞ്ഞു. സംസ്‌കാരം വിദ്യാലയങ്ങളില്‍ നിന്നും രൂപപ്പെടണം, വിദ്യാര്‍ത്ഥികള്‍ മതത്തിനുപരിയായി ചിന്തിക്കണമെന്നും യൂണിഫോം ഏകത്വത്തിന്റെ ലക്ഷണമാണെന്നും അദ്ദേഹം പറഞ്ഞു.
ഈ പ്രശ്‌നങ്ങള്‍ക്കു പിന്നില്‍ ചില നിക്ഷിപ്ത താല്‍പര്യങ്ങള്‍ ചിലരുടെ ഭാഗത്തു നിന്നും ഉണ്ടെന്നും ഇക്കാര്യം പൊലീസ് അന്വേഷിക്കുമെന്നും അദ്ദേഹം പറഞ്ഞു.
ആരൊക്കെയാണ് ഇതില്‍ പങ്കാളിയായതെന്നും എന്താണവരുടെ ലക്ഷ്യമെന്നുമുള്ള കാര്യം പൊലീസ് അന്വേഷിക്കും. ഹിജാബ്-കാവി ഷാള്‍ വിവാദം സംബന്ധിച്ച് ഹൈക്കോടതി വാദം കേള്‍ക്കാനിരിക്കെ സമാധാനം കാത്തുസൂക്ഷിക്കണമെന്ന് മുഖ്യമന്ത്രി ബസവരാജ് ബൊമ്മെ ആവശ്യപ്പെട്ടു. കൂടാതെ കോടതി ഉത്തരവിനുശേഷം സര്‍ക്കാര്‍ അടുത്തനടപടി സ്വീകരിക്കുമെന്നും അദ്ദേഹം പറഞ്ഞു.
‘പരാതി കോടതിയുടെ മുന്‍പിലാണ്. എന്തുവേണമെന്ന കാര്യത്തില്‍ കോടതി തീരുമാനമെടുക്കും. അതുകൊണ്ട് ആരുടെ ഭാഗത്തുനിന്നും സമാധാനത്തിന് ഭംഗം വരുന്ന ഒന്നും ഉണ്ടാവരുതെന്ന് അദ്ദേഹം പറഞ്ഞു. കോളജില്‍ ഹിജാബ് ധരിക്കുന്നതിന് നിയന്ത്രണമേര്‍പ്പെടുത്തിയ നടപടിക്കെതിരെ ഉഡുപ്പി പ്രി-യൂണിവേഴ്‌സിറ്റി കോളജിലെ അഞ്ച് വിദ്യാര്‍ത്ഥിനികള്‍ നല്‍കിയ പരാതിയില്‍ ഹൈക്കോടതി നാളെ വാദം കേള്‍ക്കും.
ഹിജാബിന് വിലക്കേര്‍പ്പെടുത്തിയതിന് ചില ശക്തികള്‍ രാഷ്‌ട്രീയനിറം നല്‍കിയതോടെ വിഷയം സംസ്ഥാനത്ത് വലിയ വിവാദത്തിന് തിരികൊളുത്തി. ചില വിദ്യാര്‍ത്ഥികള്‍ കാവി ഷാള്‍ ധരിച്ച് കോളജില്‍ എത്തിയതോടെ വിവാദം മറ്റൊരു തലത്തിലേക്ക് ഗതിമാറി. രണ്ടും അനുവദിക്കാനാവില്ലെന്നാണ് സര്‍ക്കാര്‍ നിലപാട്. കോടതി ഉത്തരവ് വന്നാല്‍ സര്‍ക്കാര്‍ അനുയോജ്യമായ നടപടി സ്വീകരിക്കും.
