ന്യൂഡൽഹി: നടൻ പ്രവീൺ കുമാർ സോബ്തി അന്തരിച്ചു. 74 വയസ്സായിരുന്നു അദ്ദേഹത്തിന്. അസുഖം ബാധിച്ച് ഏറെ നാളായി ചികിത്സയിലായിരുന്നു പ്രവീൺ കുമാർ. നിരവധി ബോളിവുഡ് ചിത്രങ്ങളിൽ വില്ലൻ വേഷങ്ങളിൽ തിളങ്ങിയിട്ടുണ്ടെങ്കിലും മഹാഭാരതം സീരിയലിലൂടെയാണ് അദ്ദേഹം പ്രേക്ഷക ശ്രദ്ധ നേടിയത്. ബി.ആർ ചോപ്രയുടെ മഹാഭാരതം സീരിയലിൽ ഭീമസേനനെ അവതരിപ്പിച്ചത് പ്രവീൺ കുമാർ സോബ്തി ആയിരുന്നു.
അഭിനയത്തിലേക്ക് കടക്കുന്നതിന് മുൻപ് കായിക മേഖലയിൽ തിളങ്ങിയ താരമാണ് പ്രവീൺ കുമാർ. ഹാമർ ത്രോയിലും ഡിസ്ക് ത്രോയിലും അദ്ദേഹം മികവ് തെളിയിച്ചു. ഈ ഇനങ്ങളിൽ ഇന്ത്യയ്ക്ക് വേണ്ടി നാല് ഏഷ്യൻ മെഡലുകൾ പ്രവീൺ കുമാർ നേടിയിട്ടുണ്ട്. രണ്ട് ഒളിമ്പിക്സുകളിൽ രാജ്യത്തെ പ്രതിനിധീകരിച്ചിട്ടുമുണ്ട്. അർജുന അവാർഡ് ജേതാവ് കൂടിയാണ് പ്രവീൺ കുമാർ സോബ്തി.
ബിഎസ്എഫിൽ ഡപ്യൂട്ടി കമാൻഡ് ആയി നിയമനം അദ്ദേഹത്തിന് ലഭിച്ചിരുന്നു. അമിതാഭ് ബച്ചൻ നായകനായ ഷെഹൻഷായാണ് ഏറ്റവും ശ്രദ്ധേയമായ ചിത്രം. അൻപതോളം സിനിമകളിൽ പ്രവീൺ കുമാർ അഭിനയിച്ചിട്ടുണ്ട്. രാഷ്ട്രീയത്തിലും പ്രവീൺ കുമാർ സോബ്തി തിളങ്ങിയിരുന്നു. വസിപൂർ മണ്ഡലത്തിൽ നിന്നും 2013ൽ ആം ആദ്മി പാർട്ടിയുടെ സ്ഥാനാർത്ഥിയായി മത്സരിച്ചെങ്കിലും പരാജയപ്പെട്ടു. പിന്നീട് അദ്ദേഹം ബിജെപിയിൽ അംഗത്വം നേടിയിരുന്നു.
Comments