ഓസ്‌കാർ നോമിനേഷൻ പട്ടികയിൽ നിന്നും മരക്കാർ അറബിക്കടലിന്റെ സിംഹവും ജയ് ഭീമും പുറത്ത്. ഇരു ചിത്രങ്ങളും ജനുവരി 21ന് ഔദ്യോഗിക വെബ്‌സൈറ്റിലൂടെ പുറത്തുവിട്ട മത്സര പട്ടികയിൽ ഇടം പിടിച്ചിരുന്നു. ഇന്നലെ വൈകുന്നരമാണ് 94-ാമത് അക്കാദമി ഓസ്‌കാർ അവാർഡിനുള്ള നോമിനേഷനുകൾ പ്രഖ്യാപിച്ചത്. 276 ചിത്രങ്ങൾക്കൊപ്പമാണ് മരക്കാറും ജയ് ഭീമും ഇടം നേടിയത്.
അതേസമയം ഇന്ത്യൻ ഡോക്യുമെന്റി റൈറ്റിംഗ് വിത്ത് ഫയർ നോമിനേഷൻ പട്ടികയിൽ ഇടം പിടിച്ചിട്ടുണ്ട്. ഹോളിവുഡ് താരങ്ങളായ ലെസ്ലി ജോർദ്ദാനും ട്രേസി എല്ലിസ് റോസും ചേർന്നാണ് ഓസ്‌കാർ നോമിനേഷൻസ് പ്രഖ്യാപിച്ചത്. വിജയികളെ ഈ വരുന്ന മാർച്ച് 27ന് ലോസാഞ്ചലസിലെ ഡോൾബി തീയേറ്ററിൽ നടക്കുന്ന ചടങ്ങിൽവെച്ച് പ്രഖ്യാപിക്കും.
മികച്ച നടൻ, നടി, ചിത്രം തുടങ്ങി 23 വിഭാഗങ്ങളിലേക്കുള്ള നോമിനേഷനുകളാണ് ഇന്നലെ പ്രഖ്യാപിച്ചത്. സംവിധായകൻ സ്റ്റീവൻ സ്പിൽബർഗ് വെസ്റ്റ് സൈഡ് സ്റ്റോറി എന്ന സിനിമയിലൂടെ മികച്ച സംവിധായകനുള്ള നോമിനേഷൻ പട്ടികയിൽ ഇടം നേടിയിട്ടുണ്ട്.
