ദോഹ: ഖത്തറിലെ ഇന്ത്യൻ സ്ഥാനപതി കാര്യാലയത്തിന്റെ ശിലാസ്ഥാപനം ഇന്ത്യൻ വിദേശകാര്യ മന്ത്രി ഡോ. എസ് ജയശങ്കറും ഖത്തർ ഉപപ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിൻ അബ്ദുൽറഹ്മാൻ അൽതാനിയും ചേർന്ന് നിർവഹിച്ചു. ഖത്തറിലെ ഇന്ത്യൻ സ്ഥാനപതി ഡോ. ദീപക് മിത്തൽ, ഇന്ത്യൻ കമ്മ്യൂണിറ്റി നേതാക്കൾ എന്നിവർ ഉൾപ്പെടെ 80ഓളം പ്രമുഖ വ്യക്തികൾ ശിലാസ്ഥാപന അനാച്ഛാദന ചടങ്ങിൽ പങ്കെടുത്തു.
ഖത്തറിലെ നയതന്ത്ര മേഖല എന്നറിയപ്പെടുന്ന വെസ്റ്റ് ബേയിലാണ് ഇന്ത്യൻ എംബസിക്ക് സ്വന്തം കെട്ടിടം നിർമിക്കുന്നതിന് ഖത്തർ സർക്കാർ ഭൂമി അനുവദിച്ചത്. വിശേഷാവസരങ്ങളിൽ പരമാവധി ഭാരതീയരെ പങ്കെടുപ്പിച്ച് ആഘോഷ, സാംസ്‌കാരിക പരിപാടികൾ നടത്താനുള്ള സൗകര്യത്തോടെയാണ് വിശാലമായ എംബസി മന്ദിരം നിർമ്മിക്കുന്നത്. ഖത്തറിലെ ഏറ്റവും വലിയ പ്രവാസി സമൂഹമായ ഭാരതീയരുടെ ഏറെക്കാലത്തെ ആഗ്രഹമാണ് വിപുലമായ സൗകര്യങ്ങളുള്ള സ്വന്തം എംബസി മന്ദിരമെന്നത്. അതിലേക്കുള്ള ആദ്യചുവടുവയ്പാണ് എംബസി മന്ദിര ശിലാസ്ഥാപന അനാച്ഛാദന കർമ്മത്തിലൂടെ നടന്നിരിക്കുന്നത്. പുതിയ എംബസി മന്ദിരത്തിന്റെ നിർമാണം എത്രയും വേഗം പൂർത്തീകരിക്കുമെന്ന് അംബാസഡർ ഡോ. ദീപക് മിത്തൽ പറഞ്ഞു.
Comments