ഭോപ്പാൽ; ട്രെയിൻ നീങ്ങിത്തുടങ്ങുന്നതിന് തൊട്ടുമുൻപായി റെയിൽവേ ട്രാക്കിലേക്ക് വീണ പെൺകുട്ടിയെ അതിസാഹസികമായി രക്ഷിച്ച് യുവാവ്. ട്രാക്കിൽ വീണ പെൺകുട്ടിയെ യുവാവ് നിലത്തോട് ചേർത്ത് കിടത്തുകയായിരുന്നു. ഇരുവർക്കും മുകളിലൂടെയാണ് ട്രെയിൻ പോകുന്നത്. മധ്യപ്രദേശിലെ ഭോപ്പാലിൽ ഈ മാസം അഞ്ചാം തിയതിയായിരുന്നു സംഭവം. ഇതിന്റെ ദൃശ്യങ്ങൾ സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്. ഭോപ്പാൽ സ്വദേശിയായ മുഹമ്മദ് മെഹബൂബ് ആണ് പെൺകുട്ടിയുടെ ജീവൻ അത്ഭുതകരമായി രക്ഷിച്ചത്.
ട്രാക്കിൽ വീണ പെൺകുട്ടിയെ പിടിച്ചുമാറ്റാനുള്ള സമയമില്ലാത്തതിനാലാണ് ട്രെയിൻ കടന്നു പോകുന്നത് വരെ പെൺകുട്ടിയെ ചേർത്ത് പിടിച്ച് ട്രാക്കിൽ തന്നെ കിടന്നതെന്ന് മെഹബൂബ് പറഞ്ഞു. ‘ ആദ്യം പെൺകുട്ടി പ്ലാറ്റ്ഫോമിൽ നിൽക്കുന്നത് പോലും ശ്രദ്ധിച്ചിരുന്നില്ല. സുഹൃത്തിനൊപ്പം ജോലി സ്ഥലത്തേക്ക് പോവുകയായിരുന്നു. പാളം മുറിച്ചു കടക്കുമ്പോഴാണ് ആളുകൾ ബഹളം വയ്ക്കുന്നത് ശ്രദ്ധിക്കുന്നത്. ഒരു പെൺകുട്ടി ട്രാക്കിൽ വീണു കിടക്കുന്നതാണ് കണ്ടത്. മറ്റൊന്നും ആലോചിക്കാതെ ട്രെയിനിന് മുന്നിലേക്ക് കുതിക്കുകയായിരുന്നു. പെൺകുട്ടിയെ പിടിച്ചു മാറ്റാനുള്ള സമയമില്ലാത്തത് കൊണ്ടാണ് തല താഴ്ത്തിപ്പിടിച്ച് ട്രാക്കിൽ കിടന്നതെന്നും’ മെഹബൂബ് പറയുന്നു.
Incredible bravery! 37 year old Mehboob was returning to his factory when he and some other pedestrians saw a goods train they stopped to let it pass a girl standing with her parents in fell on the tracks Mehboob sprinted dragged kept her head down @manishndtv @GargiRawat pic.twitter.com/IDqQiBLAv7
— Anurag Dwary (@Anurag_Dwary) February 12, 2022
ട്രെയിൻ കടന്നു പോയതോടെ എല്ലാവരും ആഹ്ലാദ സൂചകമായി മെഹബൂബിനെ വളഞ്ഞു. പെൺകുട്ടിയുടെ മാതാപിതാക്കളും ഈ സമയത്ത് അവിടെ ഉണ്ടായിരുന്നു. അവരും മെഹബൂബിനെ ഓടിയെത്തി ആലിംഗനം ചെയ്തു. പെൺകുട്ടി പ്ലാറ്റ്ഫോമിൽ നിൽക്കുമ്പോൾ കാൽ വഴുതി വീഴുകയായിരുന്നുവെന്നും, മെഹബൂബിന്റെ മനസ്സാന്നിദ്ധ്യം കാരണമാണ് മകളുടെ ജീവൻ തിരിച്ചു കിട്ടിയതെന്നും പെൺകുട്ടിയുടെ മാതാപിതാക്കൾ പറഞ്ഞു.
Comments