ഡെറാഡൂൺ: ഉത്തരാഖണ്ഡിൽ കോൺഗ്രസിനെതിരെ ആഞ്ഞടിച്ച് പ്രധാനമന്ത്രി നരേന്ദ്രമോദി. ഇന്ത്യയെ ഒരു രാഷ്ട്രമായി പരിഗണിക്കാൻ പോലും കോൺഗ്രസ് തയ്യാറല്ലെന്ന് അദ്ദേഹം പറഞ്ഞു. ഇന്ത്യ ഒന്നാണ്, ഈ രാജ്യം ഒന്നാണ്. ഇന്ത്യ ഒരു രാഷ്ട്രമല്ലെന്നാണ് കോൺഗ്രസ് പറയുന്നത്. ദേവഭൂമിയായ ഉത്തരാഖണ്ഡിന്റെ ദൈവീകത ബിജെപി കാത്തി സൂക്ഷിക്കുമെന്നും പ്രധാനമന്ത്രി പറഞ്ഞു.
കൊറോണ പ്രതിരോധ വാക്സിനെ കുറിച്ച് ജനങ്ങളിൽ ഭയം സൃഷ്ടിച്ചത് കോൺഗ്രസ് ആണെന്ന് പ്രധാനമന്ത്രി കുറ്റപ്പെടുത്തി. രാജ്യത്തെ വികസന പ്രവർത്തനങ്ങൾക്ക് തടസ്സം നിൽക്കുന്നത് കോൺഗ്രസാണ്. രാജ്യത്തെ ആദ്യത്തെ സംയുക്ത സൈനിക മേധാവി ബിപിൻ റാവത്തിനേയും കോൺഗ്രസ് അപമാനിച്ചു. ഈ അപമാനം രാജ്യത്തെ ജനങ്ങൾക്ക് സഹിക്കാനാകുമോ എന്നും അദ്ദേഹം ചോദിച്ചു.
നിരവധി ബംഗാളി കുടുംബങ്ങൾ ഉത്തരാഖണ്ഡിൽ താമസിക്കുന്നുണ്ട്. പുനരധിവസിപ്പിച്ച ഇവരുടെ ജാതി സർട്ടിഫിക്കറ്റിൽ നിന്നും ‘പാകിസ്താൻ’ എന്ന പരാമർശം നീക്കം ചെയ്യാൻ തീരുമാനിച്ചതിൽ മുഖ്യമന്ത്രി പുഷ്കർ ധാമിയെ താൻ അഭിനന്ദിക്കുന്നു. നിരവധി വികസന പദ്ധതികളാണ് ഉത്തരാഖണ്ഡിൽ നടപ്പാക്കാൻ തീരുമാനിച്ചിരിക്കുന്നത്. ഹൈവേകളും, മെഡിക്കൽ കോളേജും, റോപ്പ് വേകളും സംസ്ഥാനത്ത് കൊണ്ടുവരുമെന്നും പ്രധാനമന്ത്രി പ്രഖ്യാപിച്ചു.
Comments