ഭൂമി പോലെ ഭൂമി മാത്രമേ ഉള്ളൂ എന്നാണ് യുഗങ്ങളോളം മനുഷ്യർ വിശ്വസിച്ചിരുന്നത്. കാലങ്ങൾ കഴിഞ്ഞപ്പോൾ സാങ്കേതികപരമായ കൂടുതൽ കണ്ടെത്തലുകൾ നടത്തിക്കൊണ്ട് മനുഷ്യൻ ചന്ദ്രനിൽ വരെ എത്തിക്കഴിഞ്ഞു. സാങ്കേതികതയ്‌ക്കൊപ്പം സഞ്ചരിക്കുന്ന ഇന്ത്യയ്‌ക്കും ഇത്തരത്തിൽ നിരവധി നേട്ടങ്ങൾ കൈവരിക്കാൻ സാധിച്ചു എന്നത് ശ്രദ്ധേയമാണ്. എന്നാൽ ഇപ്പോൾ പുതിയ കണ്ടെത്തലുമായാണ് ഇന്ത്യൻ ശാസ്ത്രജ്ഞർ എത്തിയിരിക്കുന്നത്. ഭൂമി പോലുള്ള 60 ഗ്രഹങ്ങളാണ് ശാസ്ത്രലോകത്തെ പോലും ഞെട്ടിച്ചുകൊണ്ട് ഗവേഷകർ കണ്ടെത്തിയിരിക്കുന്നത്.
5000 ഗ്രഹങ്ങളുടെ കൂട്ടത്തിൽ നിന്നാണ് 60 ഓളം ഭൂമിയെപ്പോലെ വാസയോഗ്യമായ ഗ്രഹങ്ങളെ കണ്ടെത്തിയിരിക്കുന്നത്. ഇന്ത്യൻ ഇൻസ്റ്റിറ്റ്യൂട്ട് ഓഫ് ആസ്ട്രോഫിസിക്സിലെ ജ്യോതിശാസ്ത്രജ്ഞരാണ് ഇത് സംബന്ധിച്ച് പഠനം നടത്തിയത്. സയൻസ് ആൻഡ് ടെക്‌നോളജി, ഗവൺമെന്റ് ഓഫ് ഇന്ത്യ, ഗോവയിലെ ബിറ്റ്സ് പിലാനിയിലെ ജ്യോതിശാസ്ത്രജ്ഞർക്കൊപ്പമാണ് ഈ നേട്ടം കൈവരിച്ചത്. ആർട്ടിഫിഷ്യൽ ടെക്‌നോളജി ഉപയോഗിച്ചാണ് ഇന്ത്യൻ ജ്യോതിശാസ്ത്രജ്ഞരുടെ ഈ നേട്ടം.
സ്ഥിരീകരിച്ച 5000 ത്തിൽ 60 എണ്ണം വാസയോഗ്യമായ ഗ്രഹങ്ങളാണ്. കൂടാതെ ഏകദേശം 8000 ഗ്രഹങ്ങൾ പട്ടികയിലേക്ക് നിർദ്ദേശിക്കപ്പെട്ടിട്ടുണ്ട്. ഭൂമിയുമായി ഇവയുടെ സാമ്യം കണക്കിലെടുത്താണ് പഠനം നടത്തുന്നത്. അനോമലി ഡിറ്റക്ഷൻ രീതികളിലൂടെ ആയിരക്കണക്കിന് ഗ്രഹങ്ങളിൽ വാസയോഗ്യമായ ഒരേയൊരു ഗ്രഹമായ ഭൂമിയെ ഉപയോഗിച്ചാണ് സമാനമായ എന്തെങ്കിലും കണ്ടെത്താൻ കഴിയുമോ എന്ന് തങ്ങൾ പഠനം നടത്തിയതെന്ന് ബിറ്റ്സ് പിലാനിയിലെ ഡോ. സ്‌നേഹാൻഷു സാഹ പറഞ്ഞു. റോയൽ ആസ്ട്രോണമിക്കൽ സൊസൈറ്റിയുടെ (എംഎൻആർഎഎസ്) മാസിക നോട്ടീസ് എന്ന ജേണലിലാണ് പഠനം പ്രസിദ്ധീകരിച്ചിരിക്കുന്നത്.
കണ്ടെത്തിയ ധാരാളം എക്സോപ്ലാനറ്റുകൾക്കൊപ്പം, ഗ്രഹങ്ങളുടെ പാരാമീറ്ററുകൾ, തരങ്ങൾ, ജനസംഖ്യ, ആത്യന്തികമായി, വാസയോഗ്യമായ സാധ്യതകൾ എന്നിവ തരംതിരിച്ചിട്ടുണ്ട്. ഇവയുടെ അടിസ്ഥാനത്തിലാണ് അപൂർവ്വവും അസാധാരണവുമായ സംഭവങ്ങൾ കണ്ടെത്തിയത്. ടെലിസ്‌കോപ്പിലൂടെ മണിക്കൂറുകളാണ് നിരീക്ഷണം നടത്തിയത്. ആയിരക്കണക്കിന് ഗ്രഹങ്ങളെ മാനുവലായി സ്‌കാൻ ചെയ്ത് ഭൂമിയോട് സാമ്യമുള്ള ഗ്രഹങ്ങളെ തിരിച്ചറിഞ്ഞു. വാസയോഗ്യമായ ഗ്രഹങ്ങളെ കണ്ടെത്താൻ ആർട്ടിഫിഷ്യൽ ഇന്റലിജൻസ് (എഐ) ഫലപ്രദമായി ഉപയോഗിച്ചുവെന്നും ഗവേഷകർ പറയുന്നു.
