കാൻബെറ: ‘കോടിക്കണക്കിന് വർഷങ്ങൾക്ക് മുൻപ് ജീവിച്ചിരുന്ന ഒരു മുതല അതിന്റെ മരണം സംഭവിക്കുന്നതിന് തൊട്ടുമുൻപ് കഴിച്ചത് ഒരു ദിനോസറിന്റെ കുഞ്ഞിനെ….’ ഒരു ശാസ്ത്രമാഗസീനിൽ അടുത്തിടെ പ്രസിദ്ധീകരിച്ച പഠന റിപ്പോർട്ടിലാണ് ഇക്കാര്യം പറയുന്നത്. ഓസ്ട്രേലിയയിലെ ക്വീൻസ്ലാൻഡിൽ നിന്നും കണ്ടെത്തിയ ഫോസിലിൽ നടത്തിയ പഠനത്തലാണ് ഇക്കാര്യം കണ്ടെത്തിയത്.
വിസ്റ്റൺഫോർമേഷന് സമീപമുള്ള ഫാമിനടുത്ത് നിന്ന് 2010ലാണ് മുതലയുടെ ഫോസിൽ കണ്ടെത്തുന്നത്. ഏകദേശം 95 ദശലക്ഷം വർഷങ്ങൾക്ക് മുൻപ് ഭൂമിയിൽ ജീവിച്ചിരുന്ന കോൺഫ്രാക്ടോസക്കസ് സൊറോക്റ്റോൺ എന്ന മുതലുടേതാണ് ഫോസിൽ. 2.5 മീറ്റർ നീളമുള്ള ഈ മുതല ഫോസിലിന്റെ വയറ്റിനുള്ളിൽ നിന്നും ദഹിച്ച നിലയിലുള്ള ദിനോസർ കുഞ്ഞിന്റെ അവശിഷ്ടങ്ങൾ കണ്ടെത്തുകയായിരുന്നു.
ഓർനിതോപോഡ് സ്പീഷീസിൽപ്പെട്ട ദിനോസറിന്റെ കുട്ടിയായിരുന്നു ഇതെന്നാണ് പഠനത്തിൽ പറയുന്നത്. ഓസ്ട്രേലിയയിൽ നിന്നും ഇതാദ്യമായാണ് ദിനോസറിനെ ഭക്ഷണമാക്കുന്ന മുതലയുടെ ഫോസിൽ കണ്ടെത്തുന്നത്. ന്യൂട്രോൺ, എക്സ്റേ, സിടിസ്കാൻ ഉൾപ്പെടെയുള്ള പരിശോധനയിലാണ് മുതലയുടെ വയറ്റിനുള്ളിൽ നിന്നും ദിനോസറുറിന്റെ എല്ലുകൾ കണ്ടെത്തിയത്.
മുതലയുടെ ഫോസിലിന്റെ 35 ശതമാനത്തിലധികവും കേടുപാടുകൾ സംഭവിക്കാത്ത നിലയിലായിരുന്നു. മുതലയുടെ തലയോട്ടിയുടെ ഭാഗങ്ങളും ലഭിച്ചിരുന്നു. ഇത് പഠനത്തെ ഒരുപാട് സഹായിച്ചുവെന്ന് പഠന റിപ്പോർട്ടിൽ കുറിയ്ക്കുന്നു. മുതല ഭക്ഷിച്ച ദിനോസർ കുഞ്ഞിന് ഏകദേശം 1.7 കിലോ ഭാരം വരും. ദിനോസർ കുഞ്ഞിനെ ആക്രമിച്ച് ഭക്ഷിച്ചതാണെന്ന വിലയിരുത്തലിലാണ് ഗവേഷകർ. മുതലയുടെ ഫോസിലിന്റേയും അത് ഭക്ഷിച്ച ദിനോസറിന്റെ എല്ലിന്റേയും ചിത്രങ്ങൾ സോഷ്യൽ മീഡിയയിൽ വൈറലാവുകയാണ്.
Comments