മോഹൻലാൽ കേന്ദ്ര കഥാപാത്രമാകുന്ന ചിത്രം ആറാട്ടിന്റെ തീം സോംഗ് പുറത്തുവിട്ടു. മോഹൻലാൽ തന്നെയാണ് സോഷ്യൽമീഡിയയിലൂടെ വീഡിയോ പുറത്തുവിട്ടത്. ‘തലയുടെ വിളയാട്ട്’ എന്ന് തുടങ്ങുന്ന ഗാനമാണ് പുറത്തുവിട്ടിരിക്കുന്നത്. പാട്ടിന് വരികൾ ഒരുക്കിയിരിക്കുന്നത് ഹരിനാരായണനും ഫെജോയുമാണ്. ചിത്രം തീയേറ്ററിൽ എത്താൻ രണ്ട് ദിവസം മാത്രം ശേഷിക്കെയാണ് തീം സോംഗ് പുറത്തുവിട്ടിരിക്കുന്നത്. രാഹുൽ രാജിന്റെ ഈണത്തിന് ശബ്ദം നൽകിയിരിക്കുന്നത് എം ജി ശ്രീകുമാറും റാപ്പർ ഫെജോയും ചേർന്നാണ്.
നെയ്യാറ്റിൻകര ഗോപൻ എന്ന കഥാപാത്രമായാണ് ആറാട്ടിൽ മോഹൻലാൽ എത്തുന്നത്. ചിത്രം 18ന് തീയേറ്ററുകളിലെത്തും. ചിത്രത്തിലെ മറ്റൊരു ഗാനത്തിന്റെ ടീസർ നേരത്തെ പുറത്തുവിട്ടിരുന്നു. ‘ഒന്നാം കണ്ടം’ എന്ന തുടങ്ങുന്ന ഗാനം മിഥുൻ ജയരാജ്, രാജ്കുമാർ രാധാകൃഷ്ണൻ, ശ്വേതാ അശോക്, നാരായണി ഗോപൻ, യാസിൻ നിസാർ തുടങ്ങിയവർ ചേർന്നാണ് ആലപിച്ചിരിക്കുന്നത്. രാഹുൽ രാജ് ആണ് സംഗീതം ഒരുക്കിയിരിക്കുന്നത്.
18 കോടി ബഡ്ജറ്റിലാണ് ചിത്രം നിർമ്മിച്ചിരിക്കുന്നത്. ശ്രദ്ധ ശ്രീനാഥ് ആണ് ചിത്രത്തിൽ നായിക. വിജയരാഘവൻ, സായ്കുമാർ, സിദ്ദിഖ്, ജോണി ആൻറണി, നന്ദു, കോട്ടയം രമേശ്, ഇന്ദ്രൻസ്, ശിവജി ഗുരുവായൂർ, കൊച്ചുപ്രേമൻ, പ്രശാന്ത് അലക്സാണ്ടർ, അശ്വിൻ, ലുക്മാൻ, അനൂപ് ഡേവിസ്, രവികുമാർ, ഗരുഡ റാം, പ്രഭാകർ, രചന നാരായണൻകുട്ടി, സ്വാസിക, മാളവിക മേനോൻ, നേഹ സക്സേന, സീത തുടങ്ങി വൻ താരനിരയാണ് ചിത്രത്തിലേത്.
