തിരുവനന്തപുരം: കേരള മെഡിക്കൽ സർവീസ് കോർപ്പറേഷൻ എംഡിയായി ശ്രീറാം വെങ്കിട്ടരാമന് പുതിയ പദവി. ചുമതലയിലുണ്ടായിരുന്ന ബാലമുരളിയെ ഗ്രാമവികസന കമ്മീഷണറായി നിയമിച്ചു. ആരോഗ്യവകുപ്പിലെ ജോയിന്റ് സെക്രട്ടറിയുടെ ചുമതലയാണ് നിലവിൽ ശ്രീറാം വഹിക്കുന്നത്.
കേരളത്തിൽ ഏറെ ചർച്ചയായ കെ.എം ബഷീറിന്റെ കൊലപാതകത്തിൽ പ്രതിയാണ് ശ്രീറാം വെങ്കിട്ടരാമൻ. മാദ്ധ്യമപ്രവർത്തകനായിരുന്ന കെ.എംബഷീറിനെ വാഹനമിടിച്ച് കൊലപ്പെടുത്തിയെന്നാണ് കേസ്. 2019 ഓഗസ്റ്റിലായിരുന്നു സംഭവം. കേസിൽ വിചാരണ നേരിടവേ ആറ് മാസത്തേക്ക് ശ്രീറാമിനെ സസ്പെൻഡ് ചെയ്തിരുന്നു.
എന്നാൽ 2020 മാർച്ചിൽ ശ്രീറാമിനെ സർവീസിൽ തിരികെയെടുത്തു. കൊവിഡ്-19 സ്പെഷ്യൽ ഓഫീസറായാണ് ആരോഗ്യവകുപ്പിൽ ജോലിക്കെടുത്തത്. വിവാദങ്ങൾ ഉയർന്ന സാഹചര്യത്തിലും ശ്രീറാമിന് ഉയർന്ന പദവിയിലുള്ള ചുമതലകൾ നൽകുന്നത് സർക്കാരിനെതിരെ വലിയ വിമർശനമുയർത്തിയിരുന്നു.
Comments