സ്വന്തം പേരിൽ ഒരു തുണ്ട് ഭൂമി വാങ്ങുക എന്നത് മിക്ക ആളുകളുടെയും സ്വപ്നം തന്നെയായിരിക്കും. നഗരങ്ങളിലായാലും, ഗ്രാമപ്രദേശങ്ങളിലായാലും, സ്വന്തം പേരിലുള്ള വസ്തുവിന് ഭംഗി അൽപം കൂടുമെന്നാണ് ആളുകൾ അഭിപ്രായപ്പെടുന്നത്. അത്തരത്തിൽ സ്വന്തം പേരിൽ ഒരു ഏക്കർ ഭൂമി വാങ്ങിയ ത്രിപുര സ്വദേശി സുമൻ ദേബാണ് ഇപ്പോൾ വാർത്തകളിലെ താരം. സ്വന്തം പേരിൽ ഭൂമി വാങ്ങിയതിൽ എന്താണിത്ര പ്രത്യേക എന്നാണോ നിങ്ങളിപ്പോൾ ചിന്തിക്കുന്നത്? പ്രത്യേകതയുണ്ട്…കാരണം സുമൻ ഭൂമിയിലെ സ്ഥലമല്ല വാങ്ങിയത്. ചന്ദ്രനിലാണ് ഈ യുവാവ് ഒരേക്കർ ഭൂമി വാങ്ങിയത്.
ചന്ദ്രനിലെ ഭൂമി ഇടപാടുകളെക്കുറിച്ച് സുമന് അറിയാമായിരുന്നെങ്കിലും ബോളിവുഡ് താരങ്ങളിൽ നിന്ന് പ്രചോദനം ഉൾക്കൊണ്ടാണ് ഇവിടെ ഭൂമി സ്വന്തമാക്കിയത്. വീട് പണിയാനും ചന്ദ്രനിൽ താമസിക്കുവാനും പദ്ധതിയില്ല. എന്നിരുന്നാലും, ചന്ദ്രനിൽ ഭൂമി സ്വന്തമാക്കുന്നത് നല്ലതായി തോന്നി. തന്റെ മാതാപിതാക്കളും ഇതിൽ സന്തുഷ്ടരാണെന്ന് സുമൻ പറഞ്ഞു.
‘ബോളിവുഡ് താരങ്ങൾക്ക് ചന്ദ്രനിൽ ഭൂമിയുണ്ട്. ഞാൻ അവരിൽ നിന്ന് പ്രചോദനം ഉൾക്കൊണ്ടിരുന്നു. എന്നാൽ വിലകൾ അമിതമായിരിക്കുമെന്ന് ഞാൻ വിശ്വസിച്ചു. ഇന്റർനെറ്റിൽ ഞാൻ ഇതിനെ കുറിച്ചുള്ള കൂടുതൽ വിശദാംശങ്ങൾ തിരഞ്ഞു. വില ഞാൻ പ്രതീക്ഷിച്ചത്ര ഇല്ലായിരുന്നു. ഒരേക്കർ ചാന്ദ്രഭൂമിക്ക് ഷിപ്പിംഗും പിഡിഎഫ് ചാർജും ഉൾപ്പെടെ 6,000 രൂപ ചിലവഴിക്കേണ്ടി വന്നു’ സുമൻ വ്യക്തമാക്കി.
ഇന്റർനാഷണൽ ലൂണാർ സൊസൈറ്റിയിൽ നിന്നുമാണ് സുമൻ ഭൂമി വാങ്ങിയത്. ഇക്കഴിഞ്ഞ പ്രണയദിനത്തിൽ ഞാൻ എനിക്ക് തന്നെ ഭൂമി സമ്മാനിച്ചുവെന്നാണ് സുമൻ പറയുന്നത്. സുമൻ ദേബിന്റെ ചന്ദ്രനിലെ ഭൂമിയുടെ രജിസ്ട്രേഷൻ നടപടികൾ പൂർത്തിയായി. അതിന്റെ ഹാർഡ്കോപ്പി ഉടൻ അദ്ദേഹത്തിന് ലഭിക്കുമെന്നാണ് റിപ്പോർട്ടുകൾ പുറത്തുവരുന്നത്. ഗണിതത്തിൽ ബിരുദാനന്തര ബിരുദധാരിയാണ് സുമൻ ദേബ്.
ഇതിന് മുൻപ് സീ ഓഫ് മസ്കോവി എന്ന ചന്ദ്രന്റെ വിദൂരഭാഗത്ത് വിടവാങ്ങിയ ബോളിവുഡ് താരം സുശാന്ത് സിംഗ് രജ്പുത് സ്ഥലം വാങ്ങിയിരുന്നു. കൂടാതെ, നടൻ ഷാറൂഖ് ഖാന് ഒരു ആരാധകൻ സമ്മാനമായും ചന്ദ്രനിൽ സ്ഥലം നൽകിയിരുന്നു.
