മഡ്ഗാവ്: കേരളാ ബ്ലാസ്റ്റേഴ്സിന് കരുത്തുപകരാൻ യുവതാരം മടങ്ങിയെത്തുന്നു. പരിക്കുമൂലം മാറിനിൽക്കേണ്ടിവന്ന റുയിവാ ഹോർമിപാമാണ് ക്യാംപിൽ തിരികെയെത്തി പരിശീലനം ആരംഭിച്ചത്. ഗോളി പ്രഭസുഖാൻ ഗില്ലുമായി കൂട്ടിയിടിച്ചാണ് 21 കാരന്റെ തലയ്ക്ക് പരിക്കേറ്റത്. ശസ്ത്രക്രിയ നടത്തേണ്ടിവന്ന താരത്തിന് സീസൺ നഷ്ടമാകുമെന്നാണ് കരുതിയത്.
കഴിഞ്ഞ മത്സരത്തിൽ എടികെയെ വിറപ്പിച്ച് ടീം സമനില വഴങ്ങിയെങ്കിലും വലിയ ആത്മവിശ്വാസത്തിലാണ്. ടീമിലേക്ക് മികച്ച താരങ്ങൾ പരിക്കുമാറി വരുന്നതിന്റെ ആത്മവിശ്വാസവും ആശ്വാസവുമാണ് നൽകുന്നതെന്ന് ടീം മാനേജ്മെന്റ് അറിയിച്ചു. ടീം ഔദ്യോഗിക ട്വിറ്ററിലൂടെയാണ് താരത്തിന്റെ മടങ്ങി വരവ് അറിയിച്ചത്.
ഇന്ന് കേരളാബ്ലാസ്റ്റേഴ്സിന്റെ മത്സരം ഹൈദരാബാദിനെതിരെയാണ്. ആദ്യ പാദത്തിൽ ഏകപക്ഷീയമായ ഒരു ഗോളിന് എതിരാളികളെ തോൽപ്പിച്ചതിന്റെ ആത്മവിശ്വാസത്തിലാണ് ബ്ലാസ്റ്റേഴ്സ്. 17 മത്സരങ്ങൾ പൂർത്തിയാക്കിയ ഹൈദരാബാദിന് 32 പോയിന്റുകളാണുള്ളത്. 16 മത്സരങ്ങളിൽ നിന്ന് കേരള ബ്ലാസ്റ്റേഴ്സിന് 27 പോയിന്റുണ്ട്. ജാംഷഡ് പൂരിനും എടികെ മോഹൻ ബഗാനും പിന്നിൽ നാലാമതാണ് ബ്ലാസ്റ്റേഴ്സിന്റെ സ്ഥാനം.
Comments