കീവ്: രാജ്യത്തെ സംരക്ഷിക്കാനുള്ള റഷ്യയ്ക്കെതിരായ പോരാട്ടത്തിൽ ഒറ്റയ്ക്കാണെന്ന് യുക്രെയ്ൻ പ്രസിഡന്റ് വോളോഡിമിർ സെലെൻസ്കി. റഷ്യൻ സൈന്യത്തിന്റേയും വിമതരുടേയും ആദ്യ ലക്ഷ്യം താനാണെന്നും സെലൻസ്കി പറഞ്ഞു. റഷ്യൻ സൈനിക സംഘം യുക്രെയ്ൻ ആസ്ഥാനമായ കീവിൽ പ്രവേശിച്ചു കഴിച്ചു. രാഷ്ട്ര തലവനെ ഇല്ലാതാക്കി രാജ്യം പിടിച്ചെടുക്കുകയാകും അവരുടെ ലക്ഷ്യം. താനാണ് അവരുടെ ആദ്യ ഇര. അതിന് ശേഷം അവർ തന്റെ കുടുംബത്തേയും നശിപ്പിക്കുമെന്ന് സെലൻസ്കി പറഞ്ഞു.
യുദ്ധത്തിനില്ലെന്നും യുക്രെയ്നിലേക്ക് സൈന്യത്തെ അയക്കില്ലെന്നും അമേരിക്കൻ പ്രസിഡന്റ് ജോ ബൈഡൻ വ്യക്തമാക്കിയ പശ്ചാത്തലത്തിൽ വളരെ വൈകാരികമായാണ് സെലൻസ്കി പ്രതികരിച്ചത്. രാജ്യത്തെ സംരക്ഷിക്കാനുള്ള പോരാട്ടത്തിൽ തങ്ങൾ ഇപ്പോൾ ഒറ്റയ്ക്കാണെന്ന് സെലൻസ്കി പറഞ്ഞു. എല്ലാവർക്കും ഇപ്പോൾ ഭയമാണെന്നും യുക്രെയ്ന് നാറ്റോ അംഗത്വം ഉറപ്പു തരാനോ തങ്ങളുടെ പോരാട്ടത്തിന് കൂടെ നിൽക്കാനോ ആരും ഇല്ലെന്നും സെലൻസ്കി പ്രതികരിച്ചു.
സൈനികരും സാധാരണക്കാരും ഉൾപ്പെടെ 137 യുക്രെയ്ൻ സ്വദേശികളാണ് ഇതുവരെ കൊല്ലപ്പെട്ടത്. 316 പേർക്ക് പരിക്കേൽക്കുകയും ചെയ്തു. ഈ യുദ്ധ സാഹചര്യത്തിൽ ആരാണ് നമുക്കൊപ്പം പോരാടാനുള്ളതെന്നും ആരേയും താൻ കാണുന്നില്ലെന്നും സെലൻസ്കി പറഞ്ഞു. താനും തന്റെ കുടുംബവുമാണ് അവരുടെ ആദ്യ ഇരയെന്ന് തിരിച്ചറിഞ്ഞിട്ടും തങ്ങൾ ഇവിടെ തുടരുകയാണ്. എല്ലാവരും ജാഗ്രത പാലിക്കാനും കർഫ്യൂ ആചരിക്കാനും സെലൻസ്കി ആവശ്യപ്പെട്ടു.
