കൊച്ചി:മലയാളികൾ ഏറെ ആവേശത്തോടെ കാത്തിരിക്കുന്ന മമ്മൂട്ടി ചിത്രമാണ് സിബിഐയുടെ അഞ്ചാം ഭാഗം. പ്രേക്ഷനെ മുൾമുനയിൽ നിർത്തി ഗംഭീര ക്ലെമാക്സോടെ അവസാനിക്കുന്ന ചിത്രത്തിന്റെ നാല് ഭാഗങ്ങളും ഏറെ പ്രേക്ഷക പ്രീതി നേടിയിരുന്നു.
എസ് എൻ സ്വാമി-മമ്മൂട്ടി കൂട്ടുകെട്ടിൽ ചിത്രത്തിന്റെ അഞ്ചാം ഭാഗം ഒരുങ്ങുന്നുവെന്ന് വാർത്ത വന്ന നാൾ മുതൽ സേതുരാമയ്യരുടെ ഇടത്തും വലത്തുമായി വിക്രമും ചാക്കോയും എത്തുമെന്ന പ്രതീക്ഷയിലായിരുന്നു സിനിമാ പ്രേമികൾ. ചാക്കോയായി മുകേഷ് വീണ്ടും എത്തിയപ്പോൾ വാഹനാപകടത്തെ തുടർന്ന് വിശ്രമത്തിലായ ജഗതി ശ്രീകുമാർ വിക്രം ആയി എത്തുമോ എന്നത് ചോദ്യ ചിഹ്നമായി മാറി.
മുഴുവൻ ടീമുമില്ലാതെ സിബിഐ എങ്ങനെ പൂർണമാവാനാണ് എന്ന ചർച്ചകൾ പുരോഗമിക്കുന്നതിനിടെ സന്തോഷവാർത്തയുമായി എത്തിയിരിക്കുകയാണ് ചിത്രത്തിന്റെ അണിയറ പ്രവർത്തകർ. ചിത്രത്തിലേക്ക് ജഗതിയും ജോയിൻ ചെയ്തെന്ന് സംവധായകൻ കെ മധു വ്യക്തമാക്കി.
സേതുരാമയ്യരായി മമ്മൂട്ടി സാർ അഭിനയിക്കുമ്പോൾ, ചാക്കോ ആയി മുകേഷ് അഭിനയിക്കുമ്പോൾ, അവരോടൊപ്പം ഞങ്ങളുടെ വിക്രമും എത്തിയിരിക്കുന്നു എന്ന് സംവിധായകൻ കെ മധു പറഞ്ഞു.മകൻ രാജ്കുമാറും ചിത്രത്തിൽ ജഗതിക്കൊപ്പം ഉണ്ടാകും. ജഗതിയുടെ വീട്ടിൽ വച്ചാകും അദ്ദേഹത്തിന്റെ രംഗങ്ങൾ ഷൂട്ട് ചെയ്യുകയെന്നാണ് വിവരം.
Comments