കീവ്: റഷ്യൻ അധിനിവേശം സർവ്വ പരിധികളും ലംഘിച്ച സാഹചര്യത്തിൽ അന്താരാഷ്ട്ര നീതിന്യായ കോടതിയെ സമീപിച്ച് യുക്രെയ്ൻ. റഷ്യയുടെ അധിനിവേശത്തിനെതിരെ അന്താരാഷ്ട്ര നീതിന്യായ കോടതിയിൽ യുക്രെയ്ൻ പ്രസിഡന്റ് വ്‌ളാദിമിർ സെലൻസ്‌കി പരാതി നൽകിയത്.
റഷ്യയുടെ സൈനിക നീക്കവും അധിനിവേശവും തടയാൻ ആവശ്യമായ നടപടികൾ സ്വീകരിക്കണമെന്ന് സെലൻസ്‌കി പരാതിയിൽ ആവശ്യപ്പെട്ടു. യുക്രെയ്‌നിൽ നടക്കുന്ന ക്രൂരവും മനുഷ്യത്വരഹിതവുമായ അതിക്രമങ്ങൾക്ക് റഷ്യ ഉത്തരവാദിത്വം പറയണമെന്ന് അദ്ദേഹം ആവശ്യപ്പെട്ടു. ആക്രമണങ്ങളെ ന്യായീകരിക്കാൻ വംശഹത്യ എന്നതിനെ വളച്ചൊടിച്ച് കൈകാര്യം ചെയ്തതിന് റഷ്യ ഉത്തരം പറയണമെന്ന് സെലൻസ്‌കി ആവശ്യപ്പെട്ടു.
സൈനിക പ്രവർത്തനം നിർത്തലാക്കാൻ റഷ്യയോട് ആവശ്യപ്പെടണമെന്ന് സെലൻസ്‌കി വ്യക്തമാക്കി. ട്വിറ്ററിലൂടെയാണ് അന്താരാഷ്ട്ര നീതിന്യായ കോടതിയെ സമീപിച്ച കാര്യം സെലൻസ്‌കി വെളിപ്പെടുത്തിയത്. ജനവാസ മേഖലയിലടക്കം റഷ്യ ക്രൂരമായ ആക്രമണം അഴിച്ച് വിട്ടതിന് പിന്നാലെയാണ് യുക്രെയ്ൻ കോടതിയെ സമീപിച്ചത്.
