കൊൽക്കത്ത: ധാരാളം ഔഷധഗുണങ്ങളുള്ള ഒരു വൃക്ഷമാണ് ആര്യവേപ്പ്. ആര്യവേപ്പിന്റെ ഔഷധഗുണങ്ങളെ കുറിച്ച് വീട്ടിലെ മുതിർന്നവർ പറഞ്ഞും മറ്റും നമുക്ക് അറിയാം. പല രോഗങ്ങളേയും പ്രതിരോധിക്കാനുള്ള അത്ഭുതശേഷി ആര്യവേപ്പിനുണ്ട്. പക്ഷേ ഇപ്പോൾ ലോകത്തെയാകെ വിറപ്പിച്ചു കൊണ്ടിരിക്കുന്ന കൊറോണയെ പ്രതിരോധിക്കാൻ ആര്യവേപ്പിന് കഴിയുമോ? സാധിക്കുമെന്നാണ് അടുത്തിടെ നടത്തിയ ഒരു പഠനം പറയുന്നത്. യൂണിവേഴ്സിറ്റി ഓഫ് കൊളറാഡോയിലെ അൻസ്ചുറ്റ്സ് മെഡിക്കൽ ക്യാംപസിലേയും, ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് എഡ്യുക്കേഷൻ ആന്റ് റിസർച്ച് സെന്ററിലേയും ഒരു സംഘം ശാസ്ത്രജ്ഞർ നടത്തിയ പഠനത്തിലാണ് ഇക്കാര്യം വ്യക്തമായിരിക്കുന്നത്.
ആര്യവേപ്പ് മരത്തിന്റെ തൊലിയിൽ നിന്നെടുക്കുന്ന സത്ത് കൊറോണ ബാധിച്ചവർക്കും, വൈറസിന്റെ വ്യാപനം തടയാനും സഹായിക്കുമെന്നാണ് പഠനത്തിൽ പറയുന്നത്. വൈറോളജി എന്ന ജേണലിലാണ് ഈ പഠന റിപ്പോർട്ട് പ്രസിദ്ധീകരിച്ചിരിക്കുന്നത്. വേപ്പ് മരത്തിന്റെ തൊലിക്ക് ധാരാളം ഔഷധഗുണങ്ങളുണ്ട്. കൊറോണയുടെ ഇതുവരെ കണ്ടെത്തിയ എല്ലാവകഭേദങ്ങൾക്കുമെതിരെ ഇത് ഉപകാരപ്പെടും. മികച്ച ആന്റിവൈറൽ ഏജന്റ് കൂടിയാണ് ആര്യവേപ്പിന്റെ തൊലി.
ഇന്ത്യയിൽ ആയിരത്തിലധികം വർഷമായി പലരോഗങ്ങൾക്കുമെതിരെ ആര്യവേപ്പ് ഒരു ഔഷധമായി ഉപയോഗിച്ച് വരാറുണ്ട്. മലേറിയ, വയറിനുണ്ടാകുന്ന പ്രശ്നങ്ങൾ, അൾസർ, ത്വക് സംബന്ധമായ രോഗങ്ങൾ തുടങ്ങി പല രോഗങ്ങൾക്കെതിരെ മികച്ച പ്രതിരോധമാണ് ആര്യവേപ്പ് നൽകുന്നത്. കൊറോണയ്ക്ക് ബാധിച്ച വ്യക്തിക്ക് ഉണ്ടാകുന്ന ഗുരുതര പ്രശ്നങ്ങൾ മറികടക്കാൻ ആര്യവേപ്പിന് സാധിക്കുമോ എന്നതാണ് പഠനത്തിലൂടെ പ്രധാനമായും കണ്ടെത്താൻ ശ്രമിച്ചതെന്ന് പഠനത്തിന്റെ ഭാഗമായി പ്രവർത്തിച്ച മരിയ നാഗേൽ പറഞ്ഞു.
കൊറോണ ബാധിച്ചവരുടെ ശ്വാസകോശത്തിൽ ആര്യവേപ്പിന്റെ സത്ത് ഏറെ ഫലപ്രദമായി പ്രവർത്തിച്ചു. വൈറസിന്റെ വ്യാപനം കുറയുന്നതായും അണുക്കളുടെ ശക്തി ക്ഷയിക്കുന്നതായും കാണാൻ സാധിച്ചു. കൊറോണയ്ക്കെതിരെ മികച്ച പ്രതിരോധം തീർക്കാൻ ആര്യവേപ്പിനാകുമെന്ന് ഇതിലൂടെ തെളിഞ്ഞു. ആര്യവേപ്പിന്റെ സത്തിലെ ഏത് പ്രത്യേക ഘടകമാണ് ഇതിന് സഹായിക്കുന്നത് എന്നാകും പഠനത്തിന്റെ അടുത്ത ഘട്ടത്തിൽ കണ്ടെത്തുന്നത്. ആ പ്രത്യേക ഘടകം കണ്ടെത്തിയാൽ ഭാവിയിലേക്കും അത് സഹായകമാകുമെന്നും ശാസ്ത്രജ്ഞർ വ്യക്തമാക്കി.
Comments