പാരീസ്: യുക്രെയ്നിൽ യുദ്ധം കടുപ്പിക്കുകയാണ് റഷ്യ. പുടിന്റെ മാർഗനിർദേശങ്ങൾ പ്രാവർത്തികമാകുമ്പോൾ ഓരോ യുക്രെയ്ൻ നഗരങ്ങളും ദിനം പ്രതി ചാമ്പലാകുകയാണ്. ഇതിനിടെ സാമ്പത്തിക-വ്യാവസായിക ഉപരോധങ്ങളുമായി പുടിനെതിരെ നിലപാടെടുക്കുകയാണ് പാശ്ചാത്യരാജ്യങ്ങൾ. യുദ്ധത്തിനെതിരെ ശബ്ദമുയർത്തുന്നതിന്റെ ഭാഗമായി ലോകത്തിന്റെ നാനാഭാഗങ്ങളിൽ നടക്കുന്ന പ്രതിഷേധങ്ങളും കുറവല്ല.
അതിനിടെയാണ് പാരീസിലുള്ള വ്ളാഡിമർ പുടിന്റെ വാക്സ് പ്രതിമയും മ്യൂസിയത്തിൽ നിന്ന് യാത്ര പറഞ്ഞത്. ലോകത്തെ സ്വാധീനിച്ച നിരവധി വ്യക്തികളുടെ വാക്സ് പ്രതിമ പ്രദർശിപ്പിക്കുന്നതിൽ ഏറെ പ്രശസ്തമായ പാരീസിലെ മ്യൂസിയത്തിൽ നിന്നാണ് പുടിന്റെ പ്രതിമ എടുത്ത് മാറ്റിയത്.
VIDEO: Wax statue of Vladimir Putin removed from Paris museum.
Russia's invasion of Ukraine prompts director of the Grevin Museum in Paris to remove the statue.
"We have never represented dictators like Hitler in the Grevin Museum, we don't want to represent Putin today" pic.twitter.com/vaN3kOPPzP
— AFP News Agency (@AFP) March 3, 2022
ഹിറ്റ്ലറെപ്പോലുള്ള ഏകാധിപതികളെ ഇവിടെ പ്രതിനിധീകരിക്കില്ലെന്ന് പറഞ്ഞാണ് ഗ്രേവിൻ മ്യൂസിയത്തിന്റെ ഡയറക്ടർ പ്രതിമ മാറ്റിയത്. ഏകാധിപതികളെ ഞങ്ങൾ പ്രതിനിധീകരിക്കില്ല. അതുകൊണ്ട് തന്നെ ഇനി പുടിനെ പ്രതിനിധീകരിക്കാൻ ആഗ്രഹിക്കുന്നില്ലെന്ന് മ്യൂസിയം ഡയറക്ടർ പറഞ്ഞു. ചിലപ്പോൾ തൽസ്ഥാനത്ത് യുക്രെയ്ൻ പ്രസിഡന്റ് സെലെൻസ്കിയുടെ പ്രതിമ വരാൻ സാധ്യതയുണ്ടെന്നും അദ്ദേഹം കൂട്ടിച്ചേർത്തു.
2000ൽ തയ്യാറാക്കിയ പുടിന്റെ പ്രതിമയാണ് മ്യൂസിയം അധികൃതർ വെയർഹൗസിലേക്ക് മാറ്റിയത്. ഇനിയൊരു അറിയിപ്പ് ഉണ്ടാകുന്നതുവരെ ഇത് ഇപ്രകാരം തുടരുമെന്നും അധികൃതർ വ്യക്തമാക്കി.
Comments