ഇംഫാൽ: മണിപ്പൂരിൽ ഇന്ന് നടന്ന അവസാനഘട്ട നിയമസഭാ തെരഞ്ഞെടുപ്പിൽ 78.49 ശതമാനം പോളിംഗ് രേഖപ്പെടുത്തിയതായി തിരഞ്ഞെടുപ്പ് കമ്മീഷൻ അറിയിച്ചു. രാത്രി 9.30 വരെയുള്ള കണക്കാണിത്. രണ്ടാമത്തേതും ഒടുവിലത്തേതുമായ ഘട്ടമായിരുന്നു ഇന്ന് നടന്നത്.
22 നിയോജക മണ്ഡലങ്ങളിലായി രാവിലെ 7 മണിക്ക് ആരംഭിച്ച പോളിംഗ് വൈകുന്നേരം 4 മണിക്ക് സമാപിച്ചു. സേനാപതി, ഉഖ്റുൾ ജില്ലകളിലാണ് 80 ശതമാനത്തിൽ കൂടുതൽ പോളിങ് രേഖപ്പെടുത്തിയത്.
തൗബൽ (78 %), ജിരിബാം (77.64%), ചന്ദേൽ (76.71 %) എന്നീ ജില്ലകളിലാണ് 70-80 ശതമാനം പോളിംഗ് രേഖപ്പെടുത്തിയത്. ഏറ്റവും കുറഞ്ഞ പോളിംഗ് രേഖപ്പെടുത്തിയത് തമെങ്ലോങ് ജില്ലയിലാണ്. 66.40% പോളിംഗ്.
രണ്ടാം ഘട്ട വോട്ടെടുപ്പിൽ രണ്ട് വനിതകൾ ഉൾപ്പെടെ 92 സ്ഥാനാർത്ഥികളാണ് മത്സരരംഗത്തുണ്ടായിരുന്നത്. ലിലോംഗ്, തൗബൽ, വാങ്ഖേം, ഹെയ്റോക്ക്, വാങ്ജിംഗ് ടെന്ത, ഖാൻഗാബോ, വാബ്ഗായ്, കാക്ചിംഗ് എന്നാ ജില്ലകൾ ഉൾപ്പെടുന്ന 22 മണ്ഡലങ്ങളിലാണ് ഇന്ന് വോട്ടെടുപ്പ് നടന്നത്. വോട്ടെണ്ണൽ മാർച്ച് 10ന് നടക്കും.
