തങ്ങളുടെ വിവാഹം എങ്ങനെ ഗംഭീരമാക്കാമെന്നാണ് വധൂവരന്മാർ ചിന്തിക്കാറ്. ഇത്തരത്തിൽ ചിന്തിക്കുന്നവരുടെ മനസിലേയ്ക്ക് ഈ അടുത്തിടെ കടന്നുകൂടിയ ഐറ്റമാണ് ഡെസ്റ്റിനേഷൻ വെഡ്ഡിംഗ്. സംഗതി ഇപ്പോൾ ട്രെൻഡിങ്ങിയിരിക്കുകയാണ്. ഗോവ അല്ലെങ്കിൽ ജയ്പൂർ പോലുള്ള ഒരു സ്ഥലത്ത്, ഹോട്ടൽ അല്ലെങ്കിൽ റിസോർടിന്റെ ഒരു കെട്ടിടം മുഴുവൻ വാടയ്ക്കെടുത്താണ് പലരും ഡെസ്റ്റിനേഷൻ വെഡ്ഡിംഗ് നടത്തുന്നത്. ഇത്തരത്തിൽ ഒരു ഡെസ്റ്റിനേഷൻ വെഡ്ഡിംഗ് നടത്താൻ ആഗ്രഹിക്കുന്നവരാണോ നിങ്ങൾ? എങ്കിൽ ഡെസ്റ്റിനേഷൻ വെഡ്ഡിംഗിന്റെ പ്രധാന ലൊക്കേഷനുകളിൽ ഒന്നായ ഇറ്റലിയിലേയ്ക്ക് പോയാലോ? അതും വെറുതെ വേണ്ട കാശ് ഇങ്ങോട്ട് കിട്ടും.
മധ്യ ഇറ്റലിയിലെ തലസ്ഥാനമായ റോം ഉൾപ്പെടുന്ന ലാസിയോ മേഖലയാണ് ദമ്പതികൾക്ക് ആകർഷകരമായ ഓഫർ നൽകുന്നത്. ഈ പ്രദേശത്ത് വിവാഹിതരായാൽ, ദമ്പതികൾക്ക് വിവാഹത്തിന് ചെലവഴിക്കാൻ 2,000 യൂറോ അതായത് ഏകദേശം 1.7 ലക്ഷം രൂപ പാരിതോഷികമായി നൽകാമെന്നാണ് വാഗ്ദാനം. ‘ഫ്രം ലാസിയോ വിത്ത് ലൗ’ എന്ന് പേരിട്ടിരിക്കുന്ന ഈ ഓഫർ, 2022 ജനുവരി 1 മുതൽ ഡിസംബർ 31 വരെയാണ് ലഭ്യമാകുക. ഈ പ്രദേശത്ത് വെച്ച് വിവാഹം കഴിക്കുന്ന ഇറ്റലിക്കാർക്കും, വിദേശികൾക്കും ഓഫർ അനുഭവിക്കാൻ സാധിക്കും.
കൊറോണ വൈറസ് മൂലം തകർന്ന വിവാഹ വ്യവസായത്തെ പുനരുജ്ജീവിപ്പിക്കാനുള്ള മാർഗ്ഗമാണ് ഈ ഓഫറെന്ന് അധികൃതർ പറയുന്നത്. ഇതിലൂടെ സ്ഥലത്തെ പ്രാദേശിക കാറ്ററർമാർ, ഫ്ലോറിസ്റ്റുകൾ, വെഡ്ഡിംഗ് പ്ലാനർമാർ, ഇവന്റ് കമ്പനികൾ എന്നിവർക്ക് വീണ്ടും ഉണർവ്വ് ലഭിക്കുമെന്നാണ് പ്രതീക്ഷ. ആകെ ഒരു വ്യവസ്ഥമാത്രമാണ് പണം നൽകുന്നതിനായി പാലിക്കേണ്ടത്. ഈ 2,000 യൂറോ, ഹണിമൂൺ ചെലവുകൾ, ഫോട്ടോഗ്രാഫി തുടങ്ങിയ കാര്യങ്ങൾക്കായി ചെലവഴിക്കണമെന്നാണ് നിബന്ധന.
