നടൻ പൃഥ്വിരാജിന്റെയും സുപ്രിയയുടെയും മകളാണ് ആലി എന്ന അലംകൃത. കുഞ്ഞ് ആലിയുടെ കുറിപ്പുകളും, കഥകളും, കവിതകളുമൊക്ക പലതവണ ഇരുവരും സമൂഹമാദ്ധ്യമങ്ങളിൽ പങ്കുവെച്ചിരുന്നു. അച്ഛനും അമ്മയേയും പോലെ തന്നെ വായനയിലും എഴുത്തിലുമെല്ലാം മിടുമിടുക്കിയാണ് ആലിമോൾ. അടുത്തിടെ അന്തരിച്ച സുപ്രിയയുടെ അച്ഛന് ആലി എഴുതിയ കുറിപ്പാണ് പുതുതായി സുപ്രിയ പങ്കുവെച്ചിരിക്കുന്നത്. ആലിയുടെ ഡാഡിയ്ക്ക്(സുപ്രിയയുടെ അച്ഛൻ) ഹൃദയം തൊടുന്ന കത്താണ് ആലിമോൾ കുറിച്ചത്.
‘ഹായ് ഡാഡി, ഡാഡിയ്ക്ക് സ്വർഗത്തിൽ സുഖമാണെന്ന് വിശ്വസിക്കുന്നു. ഡാഡി നാനിയെ കണ്ടോ? സംസാരിച്ചോ? നമ്മൾ ഒന്നിച്ചുണ്ടായിരുന്ന സമയം എന്നും എന്റെ മനസ്സിലുണ്ടാകും. ലോകത്തിലെ ഏറ്റവും നല്ല ഡാഡിയായിരുന്നതിന് നന്ദി. അച്ഛാച്ചനെയോ നാനിയെയോ കണ്ടാൽ, അവരോട് എന്നെ കുറിച്ച് പറണേ. എന്റെ കുറുമ്പുകൾ എല്ലാം കാണുന്നുണ്ടെന്ന് എനിക്ക് അറിയാം. ഞാൻ കളിക്കുമ്പോൾ ചിരിക്കുമെന്നും എനിക്ക് അറിയാം. ഇനിയും ഒരുപാട് കത്തുകൾ എഴുതും. ഐ ലവ് യൂ, ബൈ ഡാഡി’ എന്നാണ് ആലിമോൾ കുറിപ്പിൽ എഴുതിയിരിക്കുന്നത്. കൂടാതെ ഒരു കുഞ്ഞ് പാട്ടും പാടിയിട്ടുണ്ട്.
‘എന്റെ(നമ്മുടെ) ഡാഡിയ്ക്ക് ആലിയുടെ ഒരു കത്ത്! ഡാഡി എല്ലാ ദിവസവും, മിനിറ്റും നിങ്ങളെ മിസ് ചെയ്യുന്നു. 2020 ഓഗസ്റ്റിൽ അന്തരിച്ച എന്റെ മുത്തശ്ശിയെയാണ് നാനി എന്ന് ഇവിടെ പരാമർശിക്കുന്നത്’ എന്ന അടിക്കുറിപ്പോടെയാണ് സുപ്രിയ ആലിയുടെ കുറിപ്പ് സമൂഹമാദ്ധ്യമങ്ങളിൽ പങ്കുവെച്ചത്. കഴിഞ്ഞ നവംബറിലാണ് സുപ്രിയയുടെ അച്ഛൻ വിജയ് കുമാർ മേനോൻ അന്തരിച്ചത്.
