കണ്ണൂർ: ടൊവിനോ തോമസ് ചിത്രം തല്ലുമാല ഷൂട്ടിംഗ് സെറ്റിൽ സംഘർഷം. ലൊക്കേഷനിലെ മാലിന്യം ഇടുന്നതിനെ തുടർന്നുണ്ടായ വാക്കേറ്റം സംഘർഷത്തിൽ കലാശിക്കുകയായിരുന്നു. മാലിന്യമിടുന്നത് ചോദ്യം ചെയ്ത നാട്ടുകാരനെ നടൻ ഷൈൻ ടോം ചാക്കോ തല്ലിയെന്നാണ് ആരോപണം. എച്ച്എംഡി മാപ്പിളാസ് ഗോഡൗണിൽ വെച്ച് സിനിമയുടെ ചിത്രീകരണം നടക്കവെയാണ് വാക്കേറ്റവും ഉന്തുംതള്ളും ഉണ്ടായത്.
ഷൈൻ ടോം ചാക്കോ തല്ലിയതിനെ തുടർന്ന് പരിക്കേറ്റ ഷമീർ എന്നയാൾ ആശുപത്രിയിൽ ചികിത്സയിലാണ്. ഇന്നലെ രാത്രിയും സ്ഥലത്ത് തർക്കമുണ്ടായിരുന്നു. നാട്ടുകാരാണ് മർദ്ദിച്ചതെന്ന് സിനിമാ പ്രവർത്തകർ പറഞ്ഞു. സംഭവത്തിൽ ആരും പരാതി നൽകിയിട്ടില്ലെന്ന് പോലീസ് അറിയിച്ചു. മാലിന്യം ഇടുന്നതിനേയും പൊതുനിരത്തിൽ വാഹനം പാർക്ക് ചെയ്തതിനേയും നാട്ടുകാർ ചോദ്യം ചെയ്തു.
നാട്ടുകാരുമായി ചിത്രത്തിന്റെ അണിയവർത്തകരും ഷൈനും ചേർന്ന് വാക്കേറ്റം നടത്തിയെന്നും ആരോപണമുണ്ട്. ഇതിനിടെ ടൊവിനോയും സംഭവത്തിൽ ഇടപെട്ടു. ഇതോടെ സ്ഥലത്ത് സംഘർഷാവസ്ഥയുണ്ടാവുകയായിരുന്നു. പോലീസ് സ്ഥലത്ത് എത്തി ഇരുകൂട്ടരുമായി സംസാരിച്ച് സ്ഥിതിഗതികൾ ശാന്തമാക്കി. ഖാലിദ് റഹ്മാൻ സംവിധാനം ചെയ്യുന്ന സിനിമയാണ് തല്ലുമാല.
കല്യാണി പ്രിയദർശനാണ് ചിത്രത്തിലെ നായിക. മുഹ്സിൻ പരാരിയും അഷ്റഫ് ഹംസയും ചേർന്നാണ് തിരക്കഥയൊരുക്കുന്നത്. ലുക്മാൻ, ചെമ്പൻ വിനോദ് ജോസ്, ജോണി ആൻറണി, ഓസ്റ്റിൻ, അസിം ജമാൽ എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. ഛായാഗ്രഹണം ജിംഷി ഖാലിദ്, സംഗീതം വിഷ്ണു വിജയ്, ഗാനരചന മുഹ്സിൻ പരാരി, എഡിറ്റിംഗ് നിഷാദ് യൂസഫ്.
