മുംബൈ: റിസർവ് ബാങ്ക് ഓഫ് ഇന്ത്യ (ആർബിഐ) ഗവർണർ ശക്തികാന്ത ദാസ് ഫീച്ചർ ഫോണുകൾക്കായി യൂണിഫൈഡ് പേയ്മെന്റ് ഇന്റർഫേസ് (യുപിഐ) പുറത്തിറക്കി. യുപിഐ123 പേ(UPI123Pay) എന്നാണ് പേരിട്ടിരിക്കുന്നത്.
ഡിജിസാഥി എന്ന പേരിൽ ഡിജിറ്റൽ പേയ്മെന്റുകൾക്കായി 24ഃ7 ഹെൽപ്പ് ലൈനും ആരംഭിച്ചു.
യുപിഐ ഉപഭോക്താക്കൾക്ക് സ്‌കാൻ ചെയ്യാനും പണമടയ്‌ക്കാനും ഒഴികെ എല്ലാ ഇടപാടുകൾക്കും ഫീച്ചർ ഫോണുകൾ ഉപയോഗിക്കാൻ കഴിയും. ഇടപാടുകൾക്ക് ഇന്റർനെറ്റ് കണക്ഷൻ ആവശ്യമില്ല. ഈ സൗകര്യം ഉപയോഗിക്കുന്നതിന് ഉപഭോക്താക്കൾ അവരുടെ ബാങ്ക് അക്കൗണ്ട് ഫീച്ചർ ഫോണുകളുമായി ലിങ്ക് ചെയ്യണം. ഫീച്ചർ ഫോണുകളിലെ യുപിഐ, സ്മാർട്ട്ഫോൺ വാങ്ങാൻ കഴിയാത്ത ഗ്രാമീണ മേഖലയിലെ ആളുകൾക്ക് യുപിഐ ഇടപാടുകളിൽ പങ്കെടുക്കാൻ സഹായിക്കുമെന്ന് ശക്തികാന്ത ദാസ് പറഞ്ഞു.
‘ഈ ദശകം രാജ്യത്തെ ഡിജിറ്റൽ പേയ്മെന്റ് സംവിധാനത്തിൽ പരിവർത്തനാത്മകമായ മാറ്റത്തിന് സാക്ഷ്യം വഹിക്കും’ അദ്ദേഹം പറഞ്ഞു. ഡിജിറ്റൽ ഇടപാടുകൾ വർദ്ധിപ്പിക്കുന്നതിന് കഴിഞ്ഞ മൂന്ന് വർഷമായി റിസർവ് ബാങ്ക് നിരവധി നടപടികൾ പ്രഖ്യാപിച്ചിട്ടുണ്ട്. സൈബർ സുരക്ഷയിൽ ശ്രദ്ധ കേന്ദ്രീകരിക്കേണ്ടതിന്റെ ആവശ്യകതയുണ്ട്. സൈബർ അപകടങ്ങളെ അഭിമുഖീകരിക്കാൻ സംവിധാനങ്ങൾ തയ്യാറാകേണ്ടതുണ്ടെന്നും ആർബിഐ ഗവർണർ പറഞ്ഞു.
ഫീച്ചർ ഫോണുകളിൽ യുപിഐ അവതരിപ്പിക്കാനുള്ള പദ്ധതി ഡിസംബറിൽ സെൻട്രൽ ബാങ്ക് പ്രഖ്യാപിച്ചതിന് പിന്നാലെയാണ് ഈ നീക്കം. യുപിഐ പേയ്മെന്റ് പ്ലാറ്റ്ഫോം 2016ൽ ആണ് അവതരിപ്പിച്ചത്. ഇപ്പോൾ ഇടപാടുകൾ പലമടങ്ങ് വർദ്ധിച്ചു. ഫീച്ചർ ഫോണുകളിൽ യുപിഐ പ്രവർത്തനക്ഷമമാക്കുന്നത് സാമ്പത്തിക സേവനങ്ങളുടെ ഡിജിറ്റൽവത്കരണം വർദ്ധിപ്പിക്കുകയും സ്മാർട്ട്ഫോണുകളോ ഇന്റർനെറ്റ് സേവനങ്ങളോ ഇല്ലാത്ത വലിയൊരു വിഭാഗം ആളുകളെ ഡിജിറ്റൽ ഇടപാട് നടത്താൻ സഹായിക്കുകയും ചെയ്യും.
