ചണ്ഡീഗണ്ഡ്; പഞ്ചാബിലെ ചരിത്ര വിജയത്തിന് പിന്നാലെ ജനങ്ങളെ അഭിനന്ദിച്ച് ഡൽഹി മുഖ്യമന്ത്രിയും ആംആദ്മി കൺവീനറുമായ അരവിന്ദ് കെജ്രിവാൾ. വിപ്ലവമാറ്റത്തിന് ജനങ്ങൾക്ക് അഭിനന്ദനങ്ങൾ എന്നാിരുന്നു കെജ്രിവാളിന്റെ ട്വീറ്റ്.
ലോകത്തൊമ്പാടും ആംആദ്മി പാർട്ടി അധികാരത്തിലെത്തുമെന്ന് അദ്ദേഹം ആത്മവിശ്വാസം പ്രകടിപ്പിച്ചു. പ്രതിപക്ഷ പാർട്ടികൾ തന്നെ അപമാനിച്ചുവെന്നും ഇവർക്ക് സ്‌നേഹത്തിന്റെ ഭാഷയിലാണ് മറുപടി നൽകിയതെന്നും അദ്ദേഹം പറഞ്ഞു.
ന്യൂഡൽഹിൽ ഹനുമാൻ ക്ഷേത്രത്തിലെ ദർശനം നടത്തിയ ശേഷം മാദ്ധ്യമ പ്രവർത്തകരോട് സംസാരിക്കുകയായിരുന്നു അദ്ദേഹം. മുതിർന്ന നേതാക്കളായ മനീഷ് സിസോദിയക്കും സത്യേന്ദ്ര ജയിനും ഒപ്പമാണ് അദ്ദേഹം ക്ഷേത്ര ദർശനത്തിന് എത്തിയത്.
അംബേക്കറും ഭഗത് സിംഗും കണ്ട സ്വപ്‌നമാണ് ആം ആദ്മി പാർട്ടി അധികാരത്തിലെത്തുമ്പോൾ യാഥാർത്ഥ്യമാകുന്നത്.ആം ആദ്മി പാർട്ടി വളരെ ചെറിയൊരു പാർട്ടിയായിരുന്നു. താൻ ഭീകരവാദിയെന്ന് അവർ കുറ്റപ്പെടുത്തി. എന്നാൽ ജനം അത് തള്ളിക്കളഞ്ഞുവെന്ന് അദ്ദേഹം പറഞ്ഞു. പഞ്ചാബിൽ മുഖ്യമന്ത്രി ചരൺ ജിത്ത് സിംഗ് ഛന്നിയെ തോൽപ്പിച്ചത് മൊബൈൽ റിപ്പയർ കടയുടമയാണെന്ന് അദ്ദേഹം ചൂണ്ടിക്കാട്ടി.
വോട്ടെണ്ണൽ അവസാനഘട്ടത്തിലേക്ക് അടുക്കുമ്പോൾ 117 സീറ്റുകളിൽ 92 സീറ്റുകളിലും മുന്നേറ്റം തുടരുകയാണ്.
