ഭോപ്പാൽ : മദ്ധ്യപ്രദേശിൽ റൺവേയിൽ നിന്നും വിമാനം തെന്നിമാറി. അലിയൻസ് എയർ എടിആർ- 72 വിമാനം ആണ് അപകടത്തിൽപ്പെട്ടത്. വിമാനത്തിലുണ്ടായിരുന്ന യാത്രികർ എല്ലാം സുരക്ഷിതരാണെന്ന് അധികൃതർ പറഞ്ഞു.
ജബൽപൂർ വിമാനത്താവളത്തിലായിരുന്നു സംഭവം. സംഭവ സമയം 55 യാത്രികരാണ് വിമാനത്തിൽ ഉണ്ടായിരുന്നത്. ലാന്റിംഗിനിടെയാണോ, പുറപ്പെടുന്നതിനിടെയാണോ അപകടം ഉണ്ടായത് എന്ന കാര്യത്തിൽ വ്യക്തതയില്ല. റൺവേയിൽ നിന്നും 10 മീറ്ററോളം ദൂരമാണ് വിമാനം തെന്നിമാറിയത്. ഡൽഹിയിൽ നിന്നും രാവിലെ 11.32 നാണ് വിമാനം ജബൽപൂരിലേക്ക് പുറപ്പെട്ടത്.
അപകടം ഉണ്ടായ ഉടൻ യാത്രികരെ അധികൃതർ സുരക്ഷിത സ്ഥാനത്തേക്ക് മാറ്റി. പിന്നീട് ഇവരെ മറ്റൊരു വിമാനത്തിൽ ലക്ഷ്യസ്ഥാനങ്ങളിൽ എത്തിച്ചെന്നാണ് റിപ്പോർട്ട്. സംഭവത്തിൽ അന്വേഷണം ആരംഭിച്ചു.
