തിരുവനന്തപുരം: ബിജെപിയെ വെല്ലുവിളിക്കാൻ കോൺഗ്രസിന് ശേഷിയില്ലെന്നും സംഘപരിവാർ ശക്തികളെ നേരിടാൻ സിപിഎം നേതൃത്വപരമായ പങ്കുവഹിക്കുമെന്നും സിപിഎം ജനറൽ സെക്രട്ടറി സീതാറാം യെച്ചൂരി. അഞ്ചു സംസ്ഥാനങ്ങളിലെ നിയമസഭാ തെരഞ്ഞെടുപ്പ് ഫലം അതിനുള്ള തെളിവാണെന്നും ഭരണഘടനാ മൂല്യങ്ങൾ സംരക്ഷിക്കാൻ എല്ലാ മതേതര പാർട്ടികളും ഒന്നിക്കണമെന്നും അദ്ദേഹം പറഞ്ഞു.
രാജ്യത്ത് കോൺഗ്രസ് എന്താണ് ചെയ്യുന്നതെന്ന് പാർട്ടി തന്നെ വിലയിരുത്തണണെന്നും യെച്ചൂരി പറഞ്ഞു. ഉത്തർപ്രദേശ് നിയമസഭാ തിരഞ്ഞെടുപ്പിൽ 399 സ്ഥാനാർത്ഥികളാണ് കോൺഗ്രസ് പാർട്ടിക്ക് വേണ്ടി മത്സരിച്ചത്. ഇതിൽ 387 പേർക്കും കെട്ടിവെച്ച കാശു പോയി. വെറും രണ്ടു സീറ്റിൽ മാത്രമാണ് കോൺഗ്രസിന് വിജയിക്കാനായത്. സംസ്ഥാനത്തുടനീളം ഓടി നടന്ന് പ്രിയങ്ക ഗാന്ധി പ്രചാരണം നടത്തിയെങ്കിലും അതൊന്നും വോട്ടെടുപ്പിൽ പ്രതിഫലിച്ചില്ല. റാലിയിൽ കണ്ട വലിയ ആൾക്കൂട്ടവും വോട്ടായി മാറിയില്ല. ഈ സാഹചര്യത്തിലാണ് കോൺഗ്രസിനെതിരെ സിപിഎം ജനറൽ സെക്രട്ടറിയുടെ പ്രതികരണം.
