വിഷ്ണു മോഹൻ സംവിധാനം ചെയ്ത ഉണ്ണി മുകുന്ദൻ ചിത്രം മേപ്പടിയാൻ ഏറെ നിരൂപക പ്രശംസ നേടിയിരുന്നു. വർഗ്ഗീയ ഉള്ളടക്കമാണെന്ന പേരിൽ പലരും ചിത്രത്തെ ഡിഗ്രേഡ് ചെയ്യാൻ ശ്രമിച്ചെങ്കിലും അവയിലൊന്നും തന്നെ അകപ്പെടാതെ മേപ്പടിയാൻ ജനമനസുകൾ കീഴടക്കുകയായിരുന്നു. ഇപ്പോഴിതാ മേപ്പടിയാൻ രണ്ടാം ഭാഗത്തെ കുറിച്ച് ഉണ്ണി മുകുന്ദൻ ഇൻസ്റ്റഗ്രാമിൽ പങ്കുവെച്ച സ്റ്റോറി സോഷ്യൽ മീഡിയയിൽ ചിരി പടർത്തുകയാണ്. കെ-റെയിലിനെ കുറിച്ചുള്ളതാണ് സ്റ്റോറി.
കെ-റെയിൽ സർവ്വേ കല്ലിന്റെ ചിത്രം പങ്കുവെച്ച് മേപ്പടിയാന്റെ രണ്ടാം ഭാഗം നോക്കിയാലോ എന്ന് സംവിധായകനോട് ചോദിക്കുകയായിരുന്നു ഉണ്ണി മുകുന്ദൻ. സംവിധായകൻ വിഷ്ണു മോഹൻ ഉണ്ണിയുടെ ചോദ്യത്തിന് മറുപടിയായി എത്തുകയും ചെയ്തു.’ മതിയായില്ല അല്ലേ’ എന്നാണ് വിഷ്ണു മോഹൻ കുറിച്ചത്. ആഷിഷ് വർഗ്ഗീസ് എന്ന ഇൻസ്റ്റഗ്രാം യൂസർ ഉണ്ണി മുകുന്ദനെ ടാഗ് ചെയ്ത് പങ്കുവെച്ച സ്റ്റോറിയാണ് താരം സ്റ്റോറിയാക്കിയത്.
മേപ്പടിയാൻ 2.0 നോക്കിക്കൂടെ ഒരു സ്കോപ്പ് ഉണ്ടെന്നാണ് ആഷിഷ് ഉണ്ണി മുകുന്ദനെ ടാഗ് ചെയ്ത് ചോദിച്ചത്. അതേസമയം സംസ്ഥാന വ്യാപകമായി കെ-റെയിലിനെതിരെ പ്രതിഷേധം ശക്തമാകുന്നതിനിടെയാണ് ഉണ്ണിയുടെ പ്രതികരണം. സിൽവർ ലൈൻ കല്ലിടലിനെതിരെ ഇന്നും പലയിടത്തും പ്രതിഷേധം നടന്നിരുന്നു. കേരളക്കര ആകെ സിൽവർ ലൈന് എതിരെ തിരിയുമ്പോഴും പദ്ധതിയുമായി മുന്നോട്ട് തന്നെ പോകുമെന്ന നിലപാടിലാണ് സർക്കാർ.
ജനുവരി 14നാണ് മേപ്പടിയാൻ റിലീസ് ചെയ്തത്. വർക്ക് ഷോപ്പ് നടത്തിപ്പുകാരനായ ജയകൃഷ്ണൻ എന്ന തനി നാട്ടിൻപുറംകാരൻ യുവാവായിട്ടാണ് ഉണ്ണി അഭിനയിച്ചത്. അഞ്ജു കുര്യനാണ് നായിക. ഇന്ദ്രൻസ്, സൈജു കുറുപ്പ്, അജു വർഗീസ്, വിജയ് ബാബു, കലാഭവൻ ഷാജോൺ, മേജർ രവി, ശങ്കർ രാമകൃഷ്ണൻ, ശ്രീജിത്ത് രവി, കോട്ടയം രമേശ്, മനോഹരിയമ്മ തുടങ്ങിയവരും ഈ ചിത്രത്തിൽ പ്രധാന വേഷങ്ങളായി എത്തിയിരുന്നു.
