തിരുവനന്തപുരം; യോഗത്തിനായി സർക്കാർ സ്‌കൂളിൽ ക്ലാസ് ഒഴിപ്പിച്ചതായി പരാതി. പഞ്ചായത്തിലെ തൊഴിലുറപ്പ് സോഷ്യൽ ഓഡിറ്റ് യോഗം നടത്താനായി മാരായമുട്ടം തത്തിയൂർ ഗവൺമെന്റ് സ്‌കൂളിലെ ക്ലാസുകളാണ് ഒഴിപ്പിച്ചത്.
സ്‌കൂളിലെ എൽപി ക്ലാസുകൾ നടക്കുന്ന ഹാളിലാണ് പഞ്ചായത്തിന്റെ യോഗം നടന്നത്. യോഗത്തിനായി കുട്ടികളെ പാചകപ്പുരയിലേക്ക് മാറ്റുകയായിരുന്നു. കഞ്ഞിപ്പുരയിൽ ഇരുന്ന കുട്ടികൾ ചൂട് താങ്ങാനാവാതെ ബഹളം വെച്ചതോട് കൂടി നാട്ടുകാർ ഇടപെടുകയായിരുന്നു. തുടർന്ന് നാട്ടുകാർ വിദ്യാഭ്യാസ മന്ത്രിയുടെ ഓഫീസിൽ വിവരം അറിയിക്കുകയും എഇഒ സ്ഥലത്തെത്തി യോഗം തടയുകയുമായിരുന്നു.
ആദ്യമായിട്ടല്ല ഇത്തരത്തിൽ സ്‌കൂളിലെ ക്ലാസുകൾ മാറ്റി ഈ രീതിയിൽ യോഗം നടക്കുന്നത്. കഴിഞ്ഞ ഒരു മാസത്തിനിടെ മൂന്നാമത്തെ യോഗമാണ് സ്‌കൂളിൽ നടന്നത്. പെരുങ്കടവിള പഞ്ചായത്തിലെ മൂന്നോളം വാർഡുകളുടെ യോഗമായിരുന്നു ഇന്ന് നടന്നത്. യോഗ നടക്കുന്ന സമയത്തെല്ലാം കുട്ടികളെ ക്ലാസിൽ നിന്നും മാറ്റുന്നത് പതിവാണ്.
അതേസമയം പഞ്ചായത്തിന്റെ നിയന്ത്രണത്തിലാണ് സ്‌കൂളുള്ളതെന്നും യോഗം നടത്താനുള്ള അധികരം അവർക്കുണ്ടെന്നും എഇഒ ചൂണ്ടിക്കാട്ടി.12 മണി മുതൽ മറ്റൊരു വാർഡിന്റെ യോഗം ഉണ്ടായിരുന്നുവെങ്കിലും എഇഒ ഇടപെട്ട് അത് മാറ്റുകയായിരുന്നു.
