പുനീത് രാജ് കുമാർ മരിക്കുന്നതിന് മുൻപ് അഭിനയിച്ച ചിത്രം ജെയിംസ് ഇന്ന് തീയേറ്ററുകളിൽ എത്തിയിരിക്കുകയാണ്. അദ്ദേഹത്തിന്റെ ജന്മദിനമായതിനാലാണ് ഇന്ന് തന്നെ ചിത്രം റിലീസ് ചെയ്യുന്നത്. പ്രിയതാരത്തോടുള്ള ആദരസൂചകമായി ഈ ചിത്രം റിലീസ് ചെയ്യുന്നതിന് ഒരാഴ്ച കന്നടയിലെ മറ്റ് ചിത്രങ്ങളുടെ റിലീസ് മാറ്റിവെച്ചിരിക്കുകയാണ്. തങ്ങളുടെ പ്രിയതാരത്തെ അവസാനമായി കാണാനായി നിരവധി ആരാധകരാണ് തീയേറ്ററുകളിലേക്ക് എത്തുന്നത്. സൈനികന്റെ വേഷത്തിലാണ് ചിത്രത്തിൽ പുനീത് എത്തിയത്.
പുനീതിന്റെ കരിയറിലെ ഏറ്റവും വലിയ റിലീസായ ജെയിംസിന് തീയേറ്ററിൽ മികച്ച പ്രതികരണമാണ് ലഭിക്കുന്നത്. അപ്പുവിനെ അവസാനമായി വീണ്ടും കണ്ടു എന്നാണ് സിനിമ കണ്ടിറങ്ങിയ ഒട്ടുമിക്ക ആളുകളും നിറ കണ്ണുകളോടെ പറയുന്നത്. പുനീതിനെ ഒന്നുകൂടി ബിഗ് സ്ക്രീനിൽ കണ്ട സന്തോഷത്തിലാണ് ആരാധകർ. സിനിമ കണ്ട് ഏറെ വിഷമത്തോടെയാണ് ചിലർ തീയേറ്ററുകളിൽ നിന്നും ഇറങ്ങിയത്. അദ്ദേഹത്തിന്റെ ആകർഷകമായ അഭിനയം സംഭാഷണം അവതരിപ്പിക്കുന്ന രീതി, സ്റ്റൈൽ എന്നിവയൊക്കെ മികച്ചതാണെന്ന് ആരാധകർ പറയുന്നത്.
ട്വിറ്ററിൽ അടക്കം ചിത്രം പ്രധാന ചർച്ചാ വിഷയം ആയിരിക്കുകയാണ്. പുനീത് ബാക്കിവെച്ച ഭാഗങ്ങൾക്ക് സിനിമയിൽ ശബ്ദം നൽകിയത് സഹോദരനും നടനുമായ ശിവരാജ് കുമാർ ആണ്. പ്രിയ ആനന്ദ്, അനു പ്രചാകർ, ശ്രീകാന്ത്, ശരത് കുമാർ, മുകേഷ് റിഷി എന്നിവരാണ് ചിത്രത്തിലെ മറ്റ് അഭിനേതാക്കൾ. ജെയിംസ്, കെജിഎഫിനെ മറികടക്കുമെന്നാണ് ട്രേഡ് അനലിസ്റ്റുകളുടെ വിലയിരുത്തൽ. അതേസമയം താരത്തിന്റേതായി പ്രഖ്യാപിക്കപ്പെട്ടിരുന്ന മറ്റൊരു ചിത്രമായ ദ്വൈത്വയുടെ ഭാവി എന്താകുമെന്ന ആശങ്കയും ആരാധകർ പങ്കുവെയ്ക്കുന്നുണ്ട്.
കന്നടയിലെ പവർ സ്റ്റാർ എന്നറിയപ്പെടുന്ന പുനീത് രാജ്കുമാർ കഴിഞ്ഞ ഒക്ടോബറിലാണ് ഹൃദയാഘാതത്തെ തുടർന്ന് മരണപ്പെടുന്നത്. മറ്റ് ആരോഗ്യ പ്രശ്നങ്ങൾ ഒന്നും തന്നെ പുനീതിന് ഉണ്ടായിരുന്നില്ല. ജിമ്മിൽവെച്ച് ശാരീരിക ബുദ്ധിമുട്ട് ഉണ്ടായതിനെ തുടർന്നാണ് ആശുപത്രിയിൽ പ്രവേശിപ്പിച്ചത്. പ്രിയതാരത്തിന്റെ മരണ വാർത്ത ഏറെ വേദനയോടെയാണ് സിനിമാ ലോകം സ്വീകരിച്ചത്.
Comments