തിരുവനന്തപുരം: ഗോവയിലെ ഫറ്റോർദ സ്റ്റേഡിയത്തിൽ ഐഎസ്എൽ കലാശപ്പോരിനിറങ്ങുന്ന കേരള ബ്ലാസ്റ്റേഴ്സിന് ആശംസകൾ നേർന്ന് മന്ത്രി വി.ശിവൻകുട്ടി. ഫേസ്ബുക്കിൽ പങ്കുവെച്ച വീഡിയോ സന്ദേശത്തിലൂടെയാണ് മന്ത്രി ആശംസകൾ നേർന്നത്. ഇക്കുറി ബ്ലാസ്റ്റേഴ്സ് കപ്പടിക്കുമെന്നാണ് മന്ത്രി വീഡിയോയിൽ പറയുന്നത്.
‘ഇത്തവണ കപ്പ് കേരള ബ്ലാസ്റ്റേഴ്സ് നേടുമെന്നാണ് എന്റെ വിശ്വാസം. ജെഴ്സിയുടെ നിറം മാറിയാലും, ബ്ലാസ്റ്റേഴ്സിന്റെ കളർ മഞ്ഞതന്നെ. ഇവാന്റെ ചുണക്കുട്ടികൾക്ക് എന്റെ വിജയാശംസകൾ’ എന്നാണ് മന്ത്രി ആശംസകൾ നേർന്നത്. കപ്പടിക്കണം എന്ന അടിക്കുറിപ്പോടെയാണ് വീഡിയോ പോസ്റ്റ് ചെയ്തിരിക്കുന്നത്.
കപ്പടിക്കണം…
Posted by V Sivankutty on Saturday, March 19, 2022
ചരിത്രപുസ്തകങ്ങളിൽ ആദ്യ ഐഎസ്എൽ കിരീടം എഴുതി ചേർക്കാൻ ആണ് കേരള ബ്ലാസ്റ്റേഴ്സും, ഹൈദരാബാദ് എഫ്സിയും തയ്യാറെടുക്കുന്നത്. ഗോവയിലെ മർഗോവിലുള്ള പിജെഎൻ സ്റ്റേഡിയത്തിൽ ഇന്ന് വൈകിട്ട് 7.30നാണ് കലാശപ്പോരാട്ടം. മൂന്നാം ഫൈനൽ കളിക്കുന്ന ബ്ലാസ്റ്റേഴ്സിനും, ആദ്യ ഫൈനലിന് ഇറങ്ങുന്ന ഹൈദരാബാദും ലക്ഷ്യമിടുന്നത് കന്നിക്കിരീടമാണ്.
അതേസമയം, കിരീട പോരാട്ടത്തിൽ കേരള ബ്ലാസ്റ്റേഴ്സിന് മഞ്ഞ ജെഴ്സി അണിയാനാവില്ല. ഫൈനലിലെ എതിരാളികളായ ഹൈദരാബാദിനായിരിക്കും മഞ്ഞ ജെഴ്സി കിട്ടുക. ലീഗ് ഘട്ടത്തിൽ കൂടുതൽ പോയിന്റ് നേടിയതിനാൽ ഹൈദരാബാദിന് ഹോം ജെഴ്സിയായ മഞ്ഞ ജെഴ്സി ധരിക്കാം. ഗാലറി മഞ്ഞയിൽ കുളിച്ചുനിൽക്കുമ്പോൾ കളത്തിൽ കറുപ്പിൽ നീലവരകളുള്ള ജെഴ്സി ധരിച്ചാവും ബ്ലാസ്റ്റേഴ്സ് കളത്തിലിറങ്ങുക.
Comments